Aqmescit SİZOsında tutulğan Aqmescitteki ekinci «Hizb ut-Tahrir davasınıñ» mabüsi, 60 yaşında qırımtatarı Servet Gaziyevniñ imayesi ve tuvğanları oña ihtisaslı tibbiy yardım kösterilmeli, dep israr eteler.
Bu aqta «Qırım birdemligi» advokatı Aleksandr Stasük ve siyasiy mabüsniñ tuvğan qız qardaşı Svetlana Ablâmitovanıñ aytqanlarına esaslanıp haber ete.
«Ağam – esli-başlı adam. İçekleri er vaqıt ağıra, yüksek qan basımı köterile, ilâc yollamaq pek qıyın», – dedi Ablâmitova.
Stasükniñ aytqanına köre, iyünniñ 30-nda o, Aqmescit SİZOsında tutulğan müvekkilini ziyaret etti ve izolâtor memuriyetine muracaat etip, ihtisaslı tibbiy yardım kösterilmesini rica etmege niyetlene.
«Tişleri yardımğa muhtac, şimdi bunıñnen oğraşamız. Ne yapacam – onı vatandaş hastahanege çıqarmağa tırışıp, ihtisaslı ekimler baqıp tedaviyler, dep ümüt etem. Aşqazan problemleri, qan basımı problemleri bar. Bular bar edi ve bar. Ebet, tahqiqat izolâtorında bulunğanı içün olar yoq olmay, qala, yani anda kerekli kibi tedaviylenmey, çünki mütehassıs yoq, ilâc yoq. Yollanğan ilâclar keç qala, birden berilmey», – dedi advokat.
İyünniñ 9-nda Rusiye kontrolindeki Qırım Yuqarı mahkemesi Aqmescitteki ekinci «Hizb ut-Tahrir davasınıñ» doquz mabüsini sentâbrniñ 15-ne qadar apiste qaldırdı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Memorial» Rusiye aq qorçalayıcı merkezi Servet Gaziyevni siyasiy mabüs dep saya.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
