Soñki 13 yıl içinde Rusiyede siyasiy sebeplerden 5 biñden ziyade insan cinaiy mesüliyetke çekildi. Bu malümatnı OVD-İnfo, 2012 senesinden berli teşkil etilgen siyasiy taqipler bazasına esaslanıp, ketire.
Siyasiy maddeler ya da sebeplerden cinaiy taqipke oğrağanlarnıñ tam sayısı — 5 038. Şimdilik 3 170 insan taqip etile. Olardan 1539-ı şimdiki vaqıtta apiste buluna.
OVD-İnfo qayd etkenine köre, 13 yıl içinde makeme siyasiy davalar boyunca 3 242 üküm çıqardı. Yalıñız 11 insan aqlandı. Maküm etilgenlerniñ apis cezası 12 763 yılnı teşkil etti.
Berilgen malümatqa köre, tahqiqat ve apis müddeti devamında 299 insan (5,98%), çeşit zorbalıqlarğa oğradı.
OVD-İnfo qayd etkenine köre, siyasiy sebeplerden açılğan davalarnıñ çoqusı ekstremistik teşkilâtnıñ faaliyetini teşkil etüv maddesine istinaden açıldı. Bu kibi aman-aman bir buçuq biñ dava bar edi. Olarnıñ çoqusı İyegova Şaatlarına qarşı. Ekinci, eñ kütleviy ise, terroristik teşkilâtnıñ faaliyetini teşkil etüv maddesidir; bu madde çerçivesindeki davalar 510 kere açıldı, ve mesüliyetke çekilgenlerniñ çoqusı Rusiye akimiyeti terroristik dep sayğan "Hizb ut-Tahrir" areketiniñ iştirakçileri. Olarnıñ çoqusı qırımtatarlar, işğal etilgen Qırım sakinleri.
Yüzlernen davalar terroristik faaliyetke açıq çağıruvlar ve terrorizmniñ açıq aqlanuvı boyunca açıldı. Olarğa sebep, meselâ, Arhangelsk FSB-sinde patlav, Qırım köprüniñ patlatılması, cenkke qol tutqan bloger Vladlen Tatarskiyniñ öldürilüvi, arbiy hızmetlerniñ areketleri oldı.
Cinayet davalarınıñ aman-aman yarısı Ukrayinada cenk başlağan soñ açıldı. 1206 insan cenkke qarşı çıqqanı içün cinaiy mesüliyetke çekildi. Hususan, Rusiye ordusı aqqında yalanlar aqqında maqale boyunca 350-den ziyade dava açıldı. OVD-İnfo malümatına köre, siyasiy maqaleler boyunca repressiyalarnıñ eñ yüksek seviyesi 2022 senesine keldi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
