Soñki künleri şarqiy cebedeki vaziyet kerginleşti, dep tarif etti Ukrayına Silâlı quvetleriniñ baş komandanı Oleksandr Sırskıy Telegramda.
Baş komandan qayd etkenine köre, «rusiyelilerniñ ücüm areketleri Rusiyede prezident saylavları keçirilgen soñ faalleşti».
«Duşman Liman, Bahmut yönelişlerinde mevzilerimizge zırhlı tehnikanen ücüm ete. Pokrovske yönelişinde tank ve uruş piyade maşinalarınen mudafaamıznı keçmege tırışalar», – dep bildirdi Sırskıy.
Onıñ aytqanına köre, «quru ava cebede zırhlı tehnikanıñ qullanıluvına yardım ete, ava açıq yerlerniñ büyük qısmını tanklarğa açtı».
«Büyük ğayıplarğa baqmadan, duşman zırhlı tehnikada yañı bölüklerni qullanıp ğayretlerni arttıra, bunıñ sayesinde taktik muvafaqiyet qazana, – dep qayd etti Ukrayına Silâlı quvetleriniñ baş komandanı.
Aprelniñ 5-nde ve 9-nda DeepState leyhasınıñ talilcileri Rusiye ordusı Çasov Yar, Çasov Yar şarqında ve şeerden şimal-şarqqa doğru Boğdanivkada ilerilegenini bildirdi.
Ukrayına Silâlı quvetleri Baş ştabınıñ aftalıq malümatına köre, Rusiye quvetleri cebeniñ bu yerinde toplana: Bahmut yönelişinde 156 ve Novopavlovske yönelişinde 159 ücüm yapıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
