Qırımlı sinoptiklerniñ fikirince, yarımadada qurğaqlıq ve suv qıtlığı vaziyetini qar eyiliştire bile.
«Yanvarniñ 8-nden 9-na keçer gecesi küçlü yağanaqlar beklenile, olarğa büyük ümütimiz bar. Qar bekleymiz, çünki qışnıñ soñunda – baarniñ başında irigen yağmur aquvı kerek, Qırım dağlarında qar yağacaq, dek bekleymiz. Yanvarniñ 10-nda dağlarda bir qar olur, belki», – dep ayttı Qırımnıñ Gidromettsentr gidrologiya ve gidrologik tahminler bölüginiñ reberi Natalya Ohrimenko «RİA Novosti Krım» agentligine.
Onıñ qayd etkenine köre, dekabrniñ soñunda-yanvarniñ başında yağğan yağanaqlarğa baqmadan, Qırımnıñ suv anbarlarındaki vaziyet eyilişmedi. Onıñ aytqanına köre, bütün suv anbarları şimdi «ölü seviyeden az».
Qurtarıcılar, Qırımda yanvarniñ 8-nde ve 9-nda yağmurlar beklenile, bazı yerlerde küçlü yağmurlar yağacaq, dep bildirgen edi.
Rusiyeniñ Gidromettsentr ilmiy reberi Roman Vilfand Qırım sakinleri içün anomal sıcaq yanvar ayını tahmin ete.
Qırımdaki Gidromettsentrniñ soñki malümatına köre, 2020 senesi dekabr ayında Qırımnıñ Partizan ve Qara özen suv yedeklerine suv kelmedi, Aluşta, Sudaq ve Kefeniñ köy özenleriniñ çoqusı qurudı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
