Rusiye kontrolindeki Qırım parlamentiniñ spikeri Vladimir Konstantinov Ukraina prezidenti Volodımır Zelenskıynıñ Qırım sakinleriniñ yarımadanıñ Ukraina kontroline qaytqanına quvanacaq laflarını «yüzsüzlik ve yalan» dep adlandırdı.
Bu aqta Zelenskıy Qırım.Aqiqatqa ve Ukraina mustaqilliginiñ 30 yılı ve «Qırım platformasınıñ» sammiti arefesinde «Qırımnı nasıl qaytaracaqmız?» mahsus leyhasına birleşken qırımlı Ukraina jurnalistlerine intervyü berip ayttı.
«Zelenskıy ırbalanmağa devam ete. Yaqında Ukraina jurnalistlerine intervyü berip, Qırımda Ukraina akimiyetini «quvana-quvana» qabul eterler, dep ayttı. Sıñırsız tsinizm, sıñırsız yüzsüzlik ve sıñırsız yalan», – dep yazdı Konstantinov Facebookta.
Ukraina prezidenti Volodımır Zelenskıy mezkür intervyüda qırımlılar Qırımnıñ Ukraina kontroline qaytmasını «quvanıp qarşılarlar», dep ayttı.
«Yerli halq, qırımlılar, Ukrainasız neler olacağını körgenler. Rusiyeliler anda musafirlikke kibi kele… Ne olacağını añlaylar. Şunıñ içün, eminim, zihniyet deñişmelerine kerek qalmaycaq. Qırımda Ukraina akimiyetini quvana-quvana qabul etecekler. Quvana-quvana, inanıñız. İçinde bu oktâbrci işaretçiligi olğanlar bile quvanacaq. Çünki Ukrainanen beraber Qırımğa ayat qaytacaq. Bundan eminim», – dedi Ukraina prezidenti.
Kreml, Rusiye 2014 senesi işğal etken Qırımnıñ topraq mensüpligi meselesi muzakere etilmeycek, dep bildirgen edi. 2014 senesi AB ve ABD Qırım işğali sebebinden Rusiyege qarşı sanktsiyalar kirsetti.
Ukraina Tış işler naziri Dmıtro Kuleba Kremlniñ Qırımnıñ topraq aitligi meselesi qapalı olğanına dair beyanatını «yañlış» dep adlandırdı. Onıñ aytqanına köre, yarımada Ukraina kontroline qaytqanına qadar Qırım meselesi halqara kün tertibinde qalacaq. «Qırım platforması» buña yardım etecek, dep qayd etti Kuleba.
Rusiye Tış işler nazirliginiñ spikeri Mariya Zaharova diger devletlerniñ Kyivniñ planlarında, hususan «Qırım platformasında» iştirak etmesi Rusiye tarafından «onıñ topraq bütünligine qast etüv» olaraq sayılacaq, dep bildirgen edi.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
