Rusiyede İrkutsk vilâyetinde suv köterilmesi sebebinden beş adam elâk oldı, bir qaç kişi ğayıp oldı, dep bildire Azatlıq Radiosı.
350 çoq adam zarar körgen, dep sayıla, olardan 97-si hastahanege qoyuldı. FVN-niñ başı Yevgeniy Ziniçenko aytqanına köre, biñden çoq adam tahliye etildi.
İrkutsk vilâyetiniñ beş rayonında 4 biñden çoq evni suv bastı, olarda 10 biñge qadar adam yaşay edi. Aman-aman 27 biñ adam yarıqasız qaldı. 15 maşna köprü bozuldı. Bundan ğayrı "Sibir" gfederal trassasınıñ bir qısmını da suv bastı, bunıñ sebebinden İrkutsk, Krasnoyarsk ve Bratsk şeerleri arasında yol areketi kesildi.
Beyanatqa köre, eñ müşkül vaziyet Tulun şeerinde (ealisi - 41 biñ adam). Taşqan İya özeni dambanı çatlattı. 900 evni suv bastı, olarda 1700 qadar adam yaşay.
Sibir.Aqiqat malümatına köre, zarar körgen rayonlarnıñ sakinleri, suv köterilmesi telükesi aqqında olarğa kimse evelden haber etmegenini ayta. Suv basqan soñ, birinci künleri qurtarıcılar ealini tahliye etmekni red ete edi, yerli akimiyet ise er şey öz yolunda, dep ayta edi. Bundan ğayrı, batırılğan rayonlarda erzaq mallarnıñ fiyatı bayağı paalılaşqanı belli oldı.
Anğaranıñ sol qolları taştı: Uda, Birüsa, İya, Çuna ve Oka büyük özenleri.
Rusiye prezidenti Vladimir Putin, Yaponiyadan G-20 sammitinden qaytqanda, İrkutsk vilâyetiniñ Bratsk şeerine uçıp keldi. Ava limanınıñ binasında o suv köterilmesinen bağlı muşavere keçirdi.
Putin, suv köterilmesi telükesi olğan rayonlarnıñ ealisini vaqtında haberdar etmege ve tahliye etilgen adamlar içün yañı yerleştirüv punktlarını azırlamağa buyurdı. Putinniñ aytqanına köre, zarar körgen rayonlardan balalarnı bala lagerlerine yollamağa kerek. Em de prezident bugünden başlap maddiy ivaznı tölemege avale etti. FVN, buña endi 600 million rubleden çoq aqça ayırılğanını biuldirdi. Mülk zararını körgenlerge maddiy yardımnıñ miqdarı 50-100 biñ ruble, hastahanege oğrağanlar ve elâk oğanlarnıñ soyları çoqça alacaq.
