Birleşken Milletlerniñ Telükesizlik şurası mayısnıñ 29-nda Ukrayina teşebbüsinen «müim toplaşuv» keçire, dep haber etti memleketniñ Tış işler naziri Andriy Sıbiğa.
«Vatandaşlar arasında qurbanlarğa sebep olğan Rusiye ücümlerinden soñ ortaqlarımıznıñ Rusiyege manalı barışıq esnasınıñ esası olaraq er taraflama ateşkesni qabul etmek içün basqı yapmaq kerekligi aqqında keniş halqara fikir birligini kene tasdıqlağan qararlı beyanatlarını bekleymiz», – dep yazdı Sıbiğa X içtimaiy ağında.
Onıñ qayd etkenine köre, Ukrayina ABD ve avropalı ortaqlarnen beraber barışıq ğayretleriniñ ilerilemesine bütünley sadıq qalğanını tasdıqlaycaq. «Rusiye barışıq esnasını sozğance ve memleketimiz ve halqımızğa qarşı sert ücümlerini yapqance istilâcığa qarşı basqı quvetleşmege devam etmeli», – dep qoştı nazir.
Sıbiğa Rusiyeni Ukrayinağa ateşkes şartlarınen bağlı memorandum leyhasını bermege çağırdı.
Bunı o, Rusiye Tış işler naziri Sergey Lavrov Rusiye tarafı Ukrayina ile barışıq añlaşmasına dair memorandum işini bitirdi ve Kyivge iyünniñ 2-nde İstanbulda muzakerelerniñ ekinci turı içün körüşmege teklif etken soñ ayttı.
Mudafaa naziri Rustem Umerov Ukrayinanıñ ateşkes vesiqası Rusiye tarafına berildi, dep bildirdi.
Kreml, Rusiyeni Ukrayinağa ateşkes tekliflerini bermege çağırğan Ukrayina Tış işler nazirliginiñ tekliflerini «konstruktiv olmağan» dep adlandırdı.
Kreml matbuat kâtibi Dmitriy Peskov Rusiyeniñ memorandum leyhasında teklif etecek ateşkes şartlarını aydınlatmağa razı olmayıp, «bütün muzakereler açıq degil, qapalı olmalı», dep bildirdi.
Mayısnıñ 16-nda İstanbulda Rusiye ve Ukrayina eyyetleri arasında muzakerelerniñ birinci turı keçti. Taraflar büyük ilerilevge irişemese de, faqat «1000-ge 1000» formatında cenk esirlerini deñişmege añlaştı. Deñişüvniñ soñki basamağı mayısnıñ 25-nde yekünlendi.
Eki taraf üç yıl içinde ilk sefer muzakere masası başına oturdı. Ukrayina ateşni 30 künge toqtatmağa talap etti. Lâkin Rusiye tarafı topraq isteklerinden öyle de vazgeçmedi – dört Ukrayina vilâyetinde öz suverenitetiniñ tanılmasını istey, Moskva bunı ateş toqtatıluvınıñ şartı olaraq bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
