Rusiye kontrolindeki Qırım Yuqarı mahkemesi imayeniñ istinaf şikâyetini qanaatlendirmedi ve qırımtatarı Zekirya Muratovnı tahqiqat izolâtorında qaldırdı, dep haber ete «Qırım birdemligi».
Advokat Nazim Şeyhmambetovnıñ bildirgenine köre, müvekkili mahkeme oturışuvına ketirgenler, şunıñ içün Muratovnen laf etmege çaresi oldı.
«Oturışuv qapalı oldı. Onı mahkemege ketirgenler, laf etip oldım. SİZOda sağlıq vaziyeti fenalaştı, dep bildirdi, soñki afta büyrekleri ağıra. Qan basımı problemleri bar. Onıñ yaşında adam tahqiqat izolâtorı şaraitlerinde tutulmamalı», – dedi advokat.
Şeyhmambetovnıñ aytqanına köre, Muratov dekabrniñ 2-ne qadar SİZOda bulunacaq.
Rusiye quvetçileri Zekirya Muratovnı iyülniñ 7-nde tuttı. FSB, onı «Hizb ut-Tahrir» bölüginde iştirak etkeninde qabaatlay.
Rusiye quvetçileriniñ areketlerini Ukraina prezidentiniñ Qırım Muhtar Cumhuriyetindeki daimiy temsilciligi takbih etti, Qırım Muhtar Cumhuriyeti ve Aqyardaki Milliy politsiya Baş idaresi tintüvler aqqında Ukraina Ceza kodeksiniñ 162-nci maddesiniñ 2-nci qısmına (mesken tiyilmemezligini bozuv) ve Ukraina Ceza kodeksiniñ 146-ncı maddesiniñ 2-nci qısmına (qanunsız alda azatlıqtan marum etüv) istinaden cinaiy tahqiqat başlattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
