Aqmescit SİZOsında qırmtatar faalcisi Edem Bekirovnen bir kamerada oturğan, “Hizb ut-Tahrir davası”nıñ iştirakçisi Server Mustafayevni ekstremist idealogiysını ögrengüv, tarqatuv ve prodagandasında qabaatladılar.
Bu aqta Mustafayevniñ advokatı sözlerinden “Qırım birdemligi” birleşmesi haber ete.
Uquq qoruyıcılarnıñ malümatına köre, Mustafayevğa “ekstremiz propagandası” aqqında raport advokatsız berildi.
“Faalci ve “Qırım birdemligi” koordinatorı Server Mustafayevğa qarşı yapılğan areketlerni biz onıñ faalligi ve mesleklerine basqı kibi köremiz”, - dep qayd ete uquq qoruyıcılar.
«Qırım birdemligi» cemaat teşebbüsiniñ koordinatorı Server Mustafayev ve qırımtatar, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Dekabr ayında Aqmescitniñ Rusiye mahkemesi Mustafayev ve Smailovnıñ apis müddetini eki ayğa uzattı. Olar 2019 senesi fevralniñ 9-na qadar SİZOda qalacaqlar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
