Mavı ve sarı boya ile aktsiya keçirgeni içün yarımadanıñ Rusiye başlıqları tarafından tevqiv etilgen qırımlı ressam Bogdan Ziza Ukrayinağa mektüp yazdı. Bunı Qırım MC Ukrayina prezidentiniñ daimiy temsilciligi haber ete.
"Selâm, Anam. Yıllarca ayırılıq devamında susqanım, saña yazmağanım içün tiz çökem ve afu isteyim. Ayatıñnıñ eñ qıyın devrinde yanında olmağanım içün afut et. Sen ve men bu qadar uzun müddet qonuşmadıq, gizlemeycegim, bu artıq ömürlik dep tüşündim. Beceremeyceksiñ dediler, meni senden tutıp aldılar. Sen de bir söz bile aytmayıp, çevirilip kettiñ. Çoq zaman darıldım, Meni bu qadar qolay alıp ketmesine izin bergenine şaştım", - dep yaza Ukrayinağa Ana degen Ziza.
Ziza, daa evel "kiçik, aqılsız ve zayıf olğanını, neler olğanını añlamağanını" qayd ette.
"Maña ihtiyacıñ olmağanını ve bunıñ içün ketkenini daima aytqan igrenç ögey ananen uyuşmağa tırışıtım. Yıllar kettikçe añladım – Seni zorladılar. Seniñ zayıflığından faydalanıp, saylav qaldırmadan, aldattılar. O, alâ daa sen menden memnün olmağanına meni inandırmağa tırışa, amma onıñ çoq yıllıq ğayretlerine baqmadan, bunıñ yalan olğanını bilem. Men qabaatlım, bağışla meni. Ketmeñe izin bergen menim. Onı itemedim, seni qoluñdan tutmadım, oña evimizge kirmege izin berdim. Bu mektüp menim içün qıyın oldı. Saña aytıp bermege istegenim çoq şey bar, amma şimdilik sözlerni saylamaq mecburım. Amma zaman kelecek, emin ol – er şeyge öz adını berecegim. Anam, susqunlığım içün çoq utanam. Susqunlığım saña ne qadar ağrı ve facia ketirgenini körem. Anam, men deñişmege tırışam. Kim ne dese desiñ, seni bir daa asla qaldırmaycağımnı bil. (...)Biñlernen qırımlınıñ adından yazam: Aziz Anam, bizni keri al, seniñ quçağında olmaq isteymiz!", - dep yazdı Ziza avgustnıñ 24-ü tarihlı mektübinde.
Mayıs ayında Kezlevli Bogdan Ziza Kezlev memuriyetiniñ binasınıñ fasadında mavı ve sarı boya ve yanıcı qarışmanıñ izleri aşkâr etilgen zaman Rusiye quvetçileri tarafından yaqalandı. Ertesi künü Qırım televizionı kezlevliniñ qırımlılar ögünde "tevbesini" kösterdi. Bu kibi videolar Rusiyeniñ Ukrayinağa qarşı büyük istilâsı başlanğandan berli Rusiye tarafdarı telegram kanalları ve haber vastalarında cenkke qarşı narazılıqlarğa açıq takbih kibi sıq-sıq rastkelinir. Bogdan Zizanıñ yaqınları onıñ üzerinde bedeniy küç qullanğanına dair alemetlerni körip, onıñ iskencege ögratılması ihtimalınıñ olğanını bildirdiler. Tutulğan soñ Bogdan Zizanı başta "Rusiye silâlı quvetlerini itibardan tüşürgeni" içün para cezasına mahküm ettiler, soñra tevqif ettiler. O vaqıttan berli o SİZO-da buluna. Bogdan Rusiye Ceza qanunnamesiniñ üç maddesine binaen qabaatlana. Qabaatlavlar arasında terrorcılıq da bar, bunıñ içün o 15 yıl apis cezasına mahküm etile bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
