Rusiye akimiyeti tarafından terrorizm qabaatı ile tevqif etilgen Kezlevli yol ressamı Bogdan Ziza Qırım sakinleri Rusiyeniñ Ukrayinağa keniş mıqyaslı istilâsına narazılıq bildirmeliler, dep saya. Bunı o Qırım.Aqiqatqa intervyü berir eken bildirdi.
"Qırımda kütleviy tirenüv, Rusiye tecavuzına, işğal akimiyetine qarşı tirenüv. Bu eñ yahşı destek olur edi, çünki aktsiyamnıñ maqsadı tamam bu edi - yani qırımlılarğa cenk kerek olmağanını, kimsege cenk kerek olmağanını köstermek", - dedi Ziza.
O, tevqif etilgen soñ, Ukrayinanı desteklemege ve Rusiyeniñ başlatqan cenkke qarşı olmağa devam etkenini qayd etti.
"Men qorqam, qorqu yoq desem yalan söyler edim. Edim ve barım. Amma öz örnegimde qorqmaq ve susmaq vaqıt keçkenini köstermek istedim. Ve atta tevqifli olıp bunı yapmağa devam etem, çünki bu meni mesülyietten marum etmey. Bizim sessizligimizniñ bir künü birisiniñ balasını, anası ya da babasını ömürlik susturta. Böyle mümkün degil, bu bizim umumiy mesüliyetimiz",- dep bildirdi ressam.
2022 senesi mayıs ayında Kezlevli Bogdan Ziza Kezlev memuriyetiniñ binasınıñ fasadında mavı ve sarı boya ve yanıcı qarışmanıñ izleri aşkâr etilgen zaman Rusiye quvetçileri tarafından yaqalandı. Ertesi künü Qırım televizionı kezlevliniñ qırımlılar ögünde "tövbesini" kösterdi. Bu kibi videolar Rusiyeniñ Ukrayinağa qarşı büyük istilâsı başlanğandan berli Rusiye tarafdarı telegram kanalları ve haber vastalarında cenkke qarşı narazılıqlarğa açıq takbih kibi sıq-sıq rastkelinir. Bogdan Zizanıñ yaqınları onıñ üzerinde bedeniy küç qullanğanına dair alemetlerni körip, onıñ iskencege ögratılması ihtimalınıñ olğanını bildirdiler. Tutulğan soñ Bogdan Zizanı başta "Rusiye silâlı quvetlerini itibardan tüşürgeni" içün para cezasına mahküm ettiler, soñra tevqif ettiler. O vaqıttan berli o SİZO-da buluna. Bogdan Rusiye Ceza qanunnamesiniñ üç maddesine binaen qabaatlana. Qabaatlavlar arasında terrorcılıq da bar, bunıñ içün o 15 yıl apis cezasına mahküm etile bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
