Şri-Lanka polisi, memlekette Pasha bayramında olğan bir sıra patlavnıñ qurbanları aqqında malümatnı yañarttı. Azatlıq Radiosı bildirgeni kibi, eñ azından 310 adam elâk oldı ve 500-ge qadar yaralandı.
Aprelniñ 23-ünde polis haber etti ki, Şri Lanka paytahtı Kolombodak ve etraftaki qasabalardaki patlavlarğa alâqası bar olğanından şübheli sayılğan 40 insan yaqalandı.
Şri Lanka prezidenti Maitripala Sirisena fevqulâde vaziyetni ilân etti, o aprelniñ 23-ünden başlandı. Böylece, polis ve arbiy adamlar, insanlarnı mahkeme razılığısız tutıp, sorğuğa çeke bile. Bundan ğayrı prezident ofisi, ücümcilerniñ çetel bağlarını aydınlatmaq içün halqara yardımnı soracaqlar, dep bildirdi.
Şimdilik aprelniñ 21-nde patlav mesüliyetini öz boynuna alğanlar yoq. Amma Şri Lanka ükümeti tünevin yüz bergen patlavlardan «Camaat at-Tauhit» yerli radikal islâm gruppası mesüliyetli, dep bildirdi.
Bundan ğayrı, ükümet, politsiya kilselerge yapıla bilecek ücümler aqqında bilip, olarnıñ ögüni alamadı, dep bildirdi.
Ükümetniñ fikirince, üç kilse ve üç musafirhanege canlı bombalar ücüm etti.
On yıl evelsi mında vatandaş cenki bitken soñ bu ücüm adada kerçekleştirilgen eñ büyük zorbalıq oldı, dep aytalar.
Politsiyanıñ malümatına köre, elâk olğanlar arasında – 35 çetel vatandaşı, ABD, Büyük Britaniya, Qıtay, Felemenk, Portugaliya vatandaşları.
