Rusiye Mudafaa naziri Sergey Şoygu, keçken afta yarımadada yüz bergen felâketten zarar körgen Qırım sakinlerine yardım kösterüv ile meşğul olğan gruppanıñ sayısını arttırmağa buyurdı.
Bunıñ aqqında iyünniñ 21-nde Rusiye Mudafaa nazirligiñ saytında haber etildi.
«Yarımada ealisine yardım köstermek içün arbiy idareden tahminen 21 biñ adam ve 1367 dane tehnika celp etildi. Taşqından zarar körgen 36 mesken yerde arbiy personalnıñ iştiragi ile yardım işler», – dep yazıla bildirmede.
Yerli memuriyetlerniñ talabı ile Qırımnıñ mesken yerlerinde köçüci aşhaneler yerleştirilgen.
«Arbiyler dağıntılarnı yoq eteler, evlerni temizleyler, zarar körgenlerge yardım eteler», – dep haber etile.
Yaltada tufan neticesinde 18 insan yararalandı, 1 erkek öldi ve 1 qadın bellisiz ğayıp oldı. Bu malümatnı iyünniñ 19-nda saba saat 6-da Qırım boyunca Rusiye Fevqulâde vaziyetler nazirligi haber etti.
İyünniñ 18-ne keçken gece, bol yağğan yağmurlar neticesinde Büyük Yaltanı suv bastı, şeerde cayav keçitleri suv astında qaldı. Yerli memurlar cemaat naqliyatınıñ qatnamasını toqtattı. Yaltada fevqulâde vaziyet ilân etildi, şeerge kiriş yeri qapalı.
Sağanaqlardan ve şeerniñ suv basqan soñ 80 transformator stantsiyası ve eki elektrik naqil hattısı elektriksiz qaldı. Krımenergonıñ haber etkenine köre, episi olıp 2700 istimalcı ışıqsız qalğan. Bundan ğayrı yerli memurlar bölgede suvnıñ kesilmesi aqqında qarar aldı ve şeer sakinlerini suv alıp qoymağa çağırdı.
