Ukrayina baş naziri Denis Şmığal frenk zenaatdaşı Fransua Bayru ile ilk subetini keçirdi, bunı o saban ayınıñ 6-nda bildirdi.
Onıñ aytqanına köre, o, Frenkistannıñ "adaletli barışıq"nı qurmaq ıntıluvlarında liderligini qayd etti ve Frenkistan halqına, ükümetine ve prezident Emmanuel Makronğa Ukrayinağa qol tutqanları içün teşekkür bildirdi.
"Mudafaa saasında işbirligimizniñ qadrini bilemiz. Ukrayina ve Frenkistan şirketleri arasında Mudafaa sanayı kompleksi saasında ilk işleşmeler endi bar. Bu işbirlikni quvetleştirmege ümüt etemiz", — dep qayd etti Şmığal.
O şunı da qoştı ki, taraflar iqtisadiy ortaqlıqnı da muzakere ettiler. Şmığal, hususan, Çerniğiv vilâyetiniñ ğayrıdan tiklenmesinde iştirak etkeni içün teşekkür bildirdi. O, ükümetniñ ortaq toplaşuvını Kıyivde ve Pariste keçirmekni teklif etti.
Ukrayina baş naziri, buzlatılğan Rusiye aktivleriniñ zapt etilmesi ve Ukrayinağa berilmesi meselesini kötergenini de qoştı.
"Baş nazirden Frenkistannıñ Ukrayina tarafında olmağa qarar alğanını ve kerekli olğan er şeyni berecegini eşitkenime quvandım. Ukrayinada telükesizlik ve barışıqnı temin etmege azır olğanıñıznıñ qadrini bilemiz", — dep ayttı o.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
