Ukrayina prezidenti Volodımır Zelenskıy Ukrayina ordusı işğal etilgen Qırımnı azat etecegine eminligini bildirdi. Bunı o skandinav jurnalistlerine intervyü berir eken bildirdi.
"Biz mıtlaqa Qırımnı işğalden azat etecekmiz. Bu şimdi olğanlardan qolay olacaq... Biz Qırımnıñ memuriy sıñırlarına kelgende rusiyelilerniñ andan qaçacağını köreceksiñiz. Olar şimdi anda okoplar qazalar, tünevin bunıñ turistik merkez, dülberlik yeri olacağını, anda milliardlar yatırılacağını aytqanlarına baqmadan, bütün plâjlarnı qazıp çıqtılar. Topraqnı zapt etmekten, adamlarnı quvmaqtan, siyasiy mabüslerni, jurnalistlerni tevqif etmekten ğayrı daa neler yaptılar? Turistik mevsim yoq, ealisini Qırımğa kelmege mecbur eteler", - dep qayd etti o.
Zelenskıynıñ sözlerine köre, Qırımnıñ Rusiye akimiyetiñ yarımadada er şeyni nezaret altında olğanını kösterüv sadece köz boyamadır
"Olar Qırımdan qaçacaqlar ve Donbastan daa tez qaçacaqlar. Qırımdaki ilk köyge barır-barmaz insanlarnıñ soqaqlarğa çıqıp bu "akimiyetni" Qırımdan quvacağını köreceksiñiz. Böyle olacaq", - dep qayd etti devlet başı.
Soñki aftalar Ukrayinanıñ qaşı ücümi ile bağlı daa çoq bildirmeler berile. Onıñ tarihı ve yeri aqqında iç bir şey belli degil. Bazıları Ukrayina ordusınıñ nişanı Donbas, bazıları ise işğal etilgen Qırım olacaq deyler.
Fevralniñ 24-nde Ukrayina prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirgen edi.
Ukrayina prezidenti ofisiniñ yolbaşçı muavini İğor Jovkva Qırım.Aqiqatqa intervyü berip, Ukrayinanıñ er angi toprağınen bağlı uzlaşuvlar bir vaqıt Rusiyenen muzakere etilmeycek, dep aytqan edi. Onıñ qayd etkenine köre, kimse Qırım Kıyivniñ kontroli altına nasıl qaytarılır aytıp olamay, amma «qaytarılacaq». Onıñ aytqanına köre, «(Qırımnı qaytaruv) diplomatik yoluna arbiy vastalar» qoşula bile.
ABD devlet kâtibiniñ muavini Viktoriya Nuladn Amerika Birleşken Devletleri Ukrayinanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi. Buña cevap olaraq Peskov Nulandnıñ Qırım darbeleri lafları «Washingtonnıñ halqara kerginlikniñ baş provokator rolüni qayd ete», dep bildirgen edi.
Bıltır dekabr ayınıñ soñunda Ukrayina arbiy istihbarat yolbaşçısı Kırılo Budanov Ukrayına Qırımnı em küç, em diplomatiyanen keri alacaq, dep bildirgen edi.
Ukrayına Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirgen edi.
Avropada ABD ordusınıñ sabıq komandanı Ben Hoces Ukrayina Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
