Rusiye işğal etken Qırımda Qarasuvbazarda aqqan eki büyük (Qırım ölçevlerine köre) Büyük Qarasuv ve Tanasuv özenleri aman-aman qurudı, dep bildire Qırım.Aqiqat mühbiri.
Özenlerniñ quruması Qırımda devamlı qurğaqlıq ve anomal sıcaqnen bağlı.
"Büyük Qarasuv özeninde soñki vaqıtqa qadar suv tolu edi, anda Qarasuvbazar ve Taygan suv anbarlarından suv tökülgen edi, şimdi suv tökülmesi toqtadı, ve özen birden boşaldı. Şimdi Şimaliy-Qırım kanalınıñ tezden temizlenmesini beklemek kerek, çünki o, esasen Büyük Qarasuvdan suvnen toldurıla edi, Salğır suvları çoqtan berli oña yetmey. Bundan soñ Qırımnıñ cenübiy-şarqındaki suv anbarları da tezden suvnen tolduracaq, ve bunıñ aqibetleri de olacaq. Domino efekti işte böyle ola", — dep tarif etti Qırım.Aqiqatqa yerli bir ülkeşınas, onıñ adını muarririyet telükesizlik sebeplerinden aytmay.Büyük Qarasuvnıñ çoqusı özenleri de qurudı.
"Büyük Qarasuvğa aşağı yaqarlıqtan suv bermek ümüdi de yoq, çünki çoqusı qurudı. Meselâ, Tanasuv özeniniñ eñ büyük özen aqımı şimdi küçük çeşmeni añdıra", dep qayd etti ülkeşınas.
Qırımnıñ Qarasuvbazar rayonındaki Taygan suv anbarı o qadar suvsız qaldı ki, ondan Büyük Qarasuv özenine suv berilmesini toqtattılar. Bir ay evelsi aynı bu sebepten Qarasuvbazar suv anbarından suv çıqarılmay edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
