Rusiye ordusı martnıñ 22-nde gece ve saba Ukrayinağa qarşı 60-tan ziyade "Şahed" pilotsız uçaqnı ve 90-ğa yaqın çeşit raketanı uçurdı, dep bildirdi Ukrayina prezidenti Volodımır Zelenskıy.
"Rusiye terroristleriniñ maqsadları dünyanı eñ açıq şekilde köre: elektrik stantsiyaları ve energiya berüv hatları, Suv elektrşk stantsiyasınıñ benti, adiy mesken evler, atta trolleybus. Rusiye insanlarnıñ adiy yaşayışına qarşı cenkleşe", - dep yazdı Zelenskıy.
Onıñ aytqanına köre, Harkiv ve vilâyetlerde, Zaporojjâ, Sumı, Poltava, Dnipropetrovsk, Odesa, Vinnıtsa, İvano-Frankivsk vilâyetlerinde, Hmelnıtskıy ve vilâyetlerde elektrik energiyasınıñ berilmesi içün iş körüne.
"Rusiye raketaları devletimizge berilgen yardım paketleri kibi keçiktirilmey. "Şahed"lerde bazı siyasetçilerdeki kibi qararsızlıq yoq. Kecikmelerniñ ve lâğu etilgen qararlarnıñ fiyatını añlamaq müimdir. "Patriot" sistemaları Harkiv ve Zaporojjâ şeerlerini qorçalamaq kerek, insanlarnı, infrastrukturanı, evlerni ve bentlerni qorçalamaq içün ava mudafaası kerek. Ortaqlar ne kerek olğanını yahşı bileler. Elbette qol tuta bileler. Bu qararlar kerek. Yaşayışnı Moskvadan kelgen bu uydurmalardan qorçalamaq kerek", - dep qayd etti Zelenskıy.
Erte saba Ukrayinanıñ bütün vilâyetlerinde Rusiye tarafından yapılğan raketa darbeleri sebebinden ava telükesi ilân etildi. Energetik infrastrukturağa yapılğan darbeler aqqında Harkiv, Zaporojjâ, Dnipropetrovsk, Vinnıtsa, Hmelnıtsk, İvano-Frankivsk vilâyetlerinde haber etilgen edi.
Delillerge ve şaatlıqlarğa baqmadan, Moskva, tam bir istilâ başlağanından berli, vatandaşlarğa nisbeten yapılğan ücümni red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
