Ukrayına Silâlı Quvetleriniñ Ava quvetleri işğal etilgen Qırımdaki Balıqlavadan ve Çauda burnundan uçurılğan 31 uçucısızdan 28-i urıp tüşürildi, dep bildirdi. Bu aqta Ukrayına Silâlı quvetleriniñ matbuat hızmeti dekabrniñ 25-nde saba haber eti.
«2023 senesi dekabrniñ 25-ne keçer gecesi duşman Çauda, Balıqlava – Qırım rayonlarından 31 «Shahed» ve eki aviatsiya raketasınen ücüm etti. Neticede Ukrayına Mudafaa ve Ava quvetleriniñ küçleri ve vastalarınıñ ava mudafaa uruşları neticesinde Odesa, Herson, Mıkolayıv, Donetsk, Kirovoğrad ve Hmelnıtskıy vilâyetlerinde 28 «Shahed-136/131» darbe uçucısızı yoq etildi», – dep aytıla haberde.
Rusiye arbiyleri bu malümatnı izaatlamadı.
Dekabrniñ 13-nde Büyük Britaniyanıñ istihbaratı Rusiye Aqyarnıñ Balıqlava rayonında dron uçurmaq içün yañı meydançıq açtı, dep bildirdi.
Balıqlava – Rusiye dronları uçurılğan beşinci tasdıqlanğan meydançıq. Uçucısızlar areket etken diger yerler – Qırımdaki Çauda burnu, qomşu Rusiyede Yeysk, Primosko-Ahtarsk ve Kursk.
Rusiye arbiyleri, top, toplu ateş raket sistemaları, dron ve raketalarnı qullanıp, Ukrayina şeerlerine muntazam sürette ateş aça. Delil ve şaatlıqlarğa baqmadan, Moskva Ukrayinada vatandaşlarğa qarşı ücüm yapqanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
