Hizb ut-Tahrir «beşinci Bağçasaray gruppasınıñ» mabüsi Abdulmecit Seytumerovğa kamerada arap tilinde Quran-ı Kerimni tutmağa yasaqlaylar. Bu aqta «Qırım birdemligi» cemaat birleşmesi haber ete.
Advokat Emil Kurbedinovnıñ aytqanına köre, qırımlı SİZO-2 memuriyetine ariza berip, qararını bekley.
«Arapça Qurannen bağlı belli problemler bar – bazı vaqıtları bereler, bazı vaqıtları bermeyler. Arap tilinde oqumağa mümkünmi ya da tek rusça tercimesini oqumaq mümkünmi sualler peyda oldı», – dep bildirdi uquqçı.
Abdulmecit Seytumerov tutuv şaraitlerini şikâyet etmedi. İmayecisine oña kelgen er şeyni ala ve mahkeme esnasına azırlana, dep tarif etti.
«Küreşmege ve bu saçma davada qabaatsız olğanını isbatlamağa niyetlene», – dep qoştı Kurbedinov.
Avgustnıñ 24-nde Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Avgustnıñ 25-nde Rusiye kontrolindeki Aqmescitniñ Kiyev rayon mahkemesi tutulğanlarnı eki ayğa SİZOğa yolladı. Bu qarar alınğanda mahkeme binası ögünde oturışuvğa kelgen faaller kütleviy şekilde tutuldı. Umumen 23 kişi tutuldı, dep haber etildi, olarğa Rusiye ordusında askerlik celpnameleri berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
