İşğal etilgen Qırımdaki Rusiye uquq qoruyıcıları Aqmescit rayonınıñ Qulçuq (Rodnikovo) köyünde yaşağan faal Seytnebi Ramazanovnıñ evinde tintüv keçirdi. Bu aqta «Qırım birdemligi» bildire.
«Evniñ yanında Gazel, eki yengil maşina tura. Azbarda altı kişi tura, evniñ içinde de uquq qoruyıcılar bar», – dep haber etti «Qırım birdemligi» mühbiri.
Tintüvden soñ uquq qoruyıcılar Ramazanovnı alıp ketmedi.
Seytnebi Ramazanov – 2018 senesi azat etilgen Kremlniñ sabıq reinesi İsmail Ramazanovnıñ babası.
«İlk malümatqa köre, şimdi Qırımda olmağan oğlu – sabıq siyasiy mabüs İsmail Ramazanovğa qarşı tahqiqat tedbirleri keçirile. Şu sebepten babasınıñ evinde teşkerüv oldı. Seytnebi Ramazanovnıñ aytqanına köre, İsmailniñ bazı vesiqaları, fotoresimleri, cep telefonı alındı», – dedi mühbir.
İsmail Ramazanov 2018 senesi yanvarniñ 23-nde tutulğan edi, Novıy mir köyündeki evinde tintüv keçirilgen edi. Rusiye Tahqiqat komiteti, onı Zello internet-radiosı vastasınen ekstremizm teşviqatında qabaatladı.
Şu sene iyülniñ 14-nde İsmail Ramazanov SİZOdan çıqtı, çünki bu cinaiy iş boyunca şeklengenler yarım yıldan ziyade nezaret altında qalmay.
Qırım aq qorçalayıcı gruppası, «içtimaiy ağlardaki ekstremizm» ükümleri çıqarılğan qırımlılar davanıñ ğayrıdan baqılmasını talap ete bile, dep bildirgen edi. Rusiye prezidenti Vladimir Putin «Rusiye Ceza kodeksiniñ 282-nci maddesine deñişmeler kirsetilgenine dair» qanunnı imzaladı.
İsmail Ramazanovğa qarşı cinaiy dava 2019 senesi yanvarniñ 16-nda qapatıldı. Ramazanovnıñ malümatı Rusiyeniñ «Terrorist ve ekstremistler cedvelinden» silingen edi.
Fevralniñ 5-nde saba işğal etilgen Qırımnıñ Canköy ve İslâm Terek rayonlarında tintüvler keçirildi, beş qırımtatarınıñ tutulğanı belli oldı. Apiske alınğanlar arasında – imam Remzi Kurtnezirovnıñ oğlu Emir, çağına yetmegen dört balanıñ babası Abibulla Smetlâyev, santehnik Rustem Mustafayev, Mırzaali Tacıbayev ve Bahtiyar Ablayev.
FSB hadimleri episini Aqmescitke tahqiqat tedbirleri içün alıp ketti. Rusiye qurğan Aqmescitniñ Kiyev rayon mahkemesi tutulğanlardan üçüni 2025 senesi aprelniñ 4-ne qadar nezaret altına aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
