Rusiye mahküm etken qırımlı Seyran Hayredinov ekzema artqanını bildirdi. Bu aqta ömür arqadaşı Zarema Hayredinova «Qırım birdemligine» bildirdi.
Onıñ aytqanına köre, Seyran apishane ekiminden tibbiy yardım istedi, oña ilâclar yazıldı. Qorantası kerekli ilâclarnı koloniyağa yolladı. Bundan ğayrı, mabüs tiş problemlerini şikâyet ete.
«Qaynanama bir şeyge baqmadan, onı oğluna alıp keterim, dep söz berdim. Ögünde endi balaban balalarnı körip şaştı. Üç kün tekrarlap turdı: «Balalarımızğa ne yaptıñ? Kiçkenelerim qayda?», – dep tarif etti Zarema Hayredinova.
Onıñ aytqanına köre, Seyrannıñ apishane idaresinen munasebetleri bir qarar. Eñ yaqın vaqıtta onı etap ete bileler, dep haber etti. Serbest vaqtı olğanda kitaplar ve Quran oquy, onıñ aytqanına köre, böylece raatlığını saqlay.
2020 senesi oraq ayınıñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
I derece saqatı Sizikov başta ev apsinde edi. Lâkin 2024 senesi sentâbr ayında onı evden alğanlar ve dekabr ayında Aqmescit SİZOsından Minusinsk apishanesine etap etkenler.