Qırımnıñ Seyitler rayonındaki Seyitler Vaqıf (Razlivı) köyüniñ akimiyeti Oraza bayramı munasebetinen iyünniñ 8-ne keçirilmesi planlaştırılğan bayramğa razılıq bermedi. Bayram tedbirleri akimiyet kontrolindeki Qırım ve Aqyar musulmanları diniy idaresiniñ (QAMDİ) ricasınen yasaqlandı. Bu aqta merasim teşkilâtçıları içtimaiy ağlarda haber ete.
«2019 senesi mayısnıñ 16-nda köy şurasınıñ reisi adına köy sakinlerinden 2019 senesi iyünniñ 8-nde bu yerde (bala meydançığı ve futbol alanı – QA) bayram keçirmek içün haber berilgen edi. 2019 senesi mayısnıñ 24-nde red cevabını aldıq, bu yer «köy şurasında kütleviy tedbirler içün kelişken yerler sırasına kirmey», dep qayd etile», – dep yazdı Facebookta Enver Abselâmov.
Abselâmovnıñ aytqanına köre, bunıñ sebebi QAMDİ vekiliniñ köy şurasınıñ reisi adına bergen muracaatı oldı, anda bu tedbir QMADİ ile muzakere etilmedi, demek ki, izin berilmemeli, dep aytıla.
«2019 senesi mayısnıñ 29-nda yerli sakinler eyyeti körüşüvge (köy şurasınıñ reisi ile – QA) bardı. QMDİ rayon memuriyetine muracaatta bulunıp, bu tedbirge izin bermemege rica ete, çünki QMDİ ile añlaşma yoq eken… Ertesi künü yasaq sebebi aydınlatılğan vesiqa berildi. Resmiy şekilde yasaqnıñ sebebi bayram keçirilecegi aqqında vaqtında haber etilmegeni oldı», – dep qoştı faal.
Onıñ qayd etkenine köre, haber berilgen künden iyünniñ 8-ne qadar 16 kün qala edi, qanunğa köre ise 17 kün olması kerek.
QAMDİ vekilleri ya da Seyitler Vaqıf köyüniñ yerli akimiyeti bunı açıq sürette daa izaatlamadı.
Oraza bayramı – Ramazan ayınıñ soñunda qayd etilgen musulman bayramıdır. Musulmanlar Şavval (musulman taqviminiñ doquzıncı) ayınıñ birinci kününi qayd ete.
2014 senesi Rusiye Qırımnı işğal etken soñ Qırım musulmanları diniy idaresi yapqan areketlerini Qırımtatar Milliy Meclisi ile muzakere etmeyip, Rusiye qanunlarına köre Qırım ve Aqyar musulmanları diniy idaresi olaraq yañıdan qayd etilgen edi.
2016 senesi noyabr ayında Qırımdan köçip kelgen musulman cemiyetleri toplaşıp, esas Ukrainada Qırım Muhtar Cumhuriyeti musulmanlarınıñ diniy idaresini qurmağa qarar aldı. Müfti olaraq Ayder Rustemov saylandı.
2017 senesi oktâbr ayında Ukraina medeniyet nazirliginiñ millet ve din departamenti Rustemov yolbaşçılığında Qırım Muhtar Cumhuriyeti musulmanlarınıñ diniy idaresini qayd etti.
