İşğal etilgen Qırımnıñ Seyitler qasabasında yanvarniñ 5-ne keçer gecesi patlavlar eşitildi. Bu aqta Qırım Telegram kanalları ve Rusiye blogerleri haber ete.
«ÇP Krım» Telegram kanalı, tahminlerge köre, ava mudafaasınıñ iş sesleri qayd etilgen videonı derc etti. Berilgen malümatqa köre, o, patlayıcı madde tolu dronlarnı tüşürdi.
Kökteki ateş videosını «Krımskiy veter» Telegram kanalı da derc etti.
«Seyitler, ava mudafaası çalıştı, nişanlar çölde tüşti. Tüşken soñ patladı, zarar yoq», – dep yazdı Rusiye tarafdarı qırımlı bloger Aleksandr Talipov.
Adise tafsilâtları aqqında malümat berilmey. Rusiye memurları ve arbiyleri bu vaziyetni izaatlamay, Ukrayına resmiy şahıslarınıñ da izaatları yoq.
Avgusttan başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
