Qırım.Aqiqat leyhasınıñ (Azatlıq Radiosınıñ Ukrayına hızmeti) «Sessiz sürgünlik» vesiqalı filmi Amerika Birleşken Devletlerinde New York Festivals® 2024 (New York Festivals TV & Film Awards) telekino mukâfatınıñ altı mukâfatını «İnsan aqları» namzetliginde aldı. Bu aqta tedbir teşkilâtçıları haber etti. 2024 senesi NYF televizion ve kinomukâfatınıñ ğalipleri aprelniñ 16-nda (Kyivde aprel 17-niñ gecesi edi) New Yorkta Storytellers virtual gala-aqşamında ilân etildi.
1957 senesi tesis etilgen TV & Film Awards mukâfatı bu yıl 5 qıtadan 14 kategoriyada yüzlernen ariza aldı. Vesiqalı ve oyun olmağan filmler gruppasında qısqa mukâfat cedvelinde olğan namzetler arasında – Al Jazeera, Yeti Television, Big Ten Network, Fox Sports Network, «Amerikanıñ sesi», NHK, GMA Network, Wild Pacific Media şirketleriniñ çekim taqımları. «Sessiz sürgünlik» filmi «İnsan aqları» nominatsiyasında ğalebe qazandı.
Qırım.Aqiqatnıñ «Sessiz sürgünlik» vesiqalı filmi qırımtatarlar Qırımdan nasıl sürgün etilgenini, Rusiye qırımtatarlarnı kene nasıl evsiz qaldırğanını köstere. Qırımtatarlar vatanlarını ne içün kütleviy sürette terk etmege mecbur olğanları aqqında. 1944 senesi sovet akimiyeti qırımtatarlarnı zorbalıqnen yük vagonlarında çıqardı, şimdi ise Rusiye Qırımnıñ tamır halqını evini terk etmege mecbur ete.
Film qaramanları ikâyelerini, Rusiye işğal etken Qırımdan nasıl ketkenlerini, ne yaşağanlarını, ne içün qalıp olamağanlarını, şimdi qayda ve nasıl yaşağanlarını ve Qırımğa qaytıp olacaqlarını tarif etti.
Çekimler Poloniya, Almaniya, Belçika, Türkiye, Ukrayina ve işğal etilgen Qırımda keçti. Filmde film qaramanlarınıñ şahsiy arhivlerinden unikal kadrlar qullanıldı, olarnıñ bazıları ilk sefer derc etile.
Film müellifleri: Anjelika Rudenko – jurnalist-muarrir, Dmitriy Culay – rejisser-stsenarist, Nikita İsayko – operator, Elvina Seitbullayeva – prodüser.
Qırım.Aqiqat – Azatlıq Radiosı Ukrayına hızmetiniñ Qırım leyhası – 2014 senesi mart ayında, işğal başlağanınen ve Rusiyeniñ qanunsız Qırım ilhaqı vaqtında peyda oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
