Film endi 300 biñden ziyade kere baqıldı. Onı eñ çoq Rusiyede seyir eteler - seyircilerniñ 35 fayızı, Ukrayinada - 23 fayızı ve Qazahistanda - 4 fayızı. Seyirciler arasında qadınlar (53%) ve erkekler (47%) aman-aman aynı. Film 45 yaştan büyük seyirciler arasında eñ populârdır.
Qırım.Aqiqatnıñ "Sessiz sürgünlik" vesiqalı filmi qırımtatarlar Qırımdan nasıl sürgün etilgenini, Rusiye qırımtatarlarnı kene nasıl evsiz qaldırğanını köstere. Qırımtatarlar vatanlarını ne içün kütleviy sürette terk etmege mecbur olğanları aqqında. 1944 senesi sovet akimiyeti qırımtatarlarnı zorbalıqnen yük vagonlarında çıqardı, şimdi ise Rusiye Qırımnıñ tamır halqını evini terk etmege mecbur ete.
Çekimler Poloniya, Almaniya, Belçika, Türkiye, Ukrayina ve işğal etilgen Qırımda keçti. Filmde film qaramanlarınıñ şahsiy arhivlerinden unikal kadrlar qullanıldı, olarnıñ bazıları ilk sefer derc etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
