Filmniñ başlanuvından evel milliy azlıqlar eviniñ müdiri Gjegoj Miloseviç, Litvaniya Tatar cemiyetleri birliginiñ reisi Adas Yakubauskas, em de Ukrayina mustaqil siyasiy tedqiqatlar merkezi şurasınıñ reisi, Milliy dayanıqlıq ve birdemlik platformasınıñ tesisçisi Yuliya Tişçenko kiriş sözüni ayttılar.
Demonstratsiyanıñ başında seyirciler film prodüseri Elvina Seitbullayeva ve filmniñ müellifi Anjelika Rudenkonıñ kiriş sözlerini online diñlep oldılar.
Qırım.Aqiqat mühbirine kösterüvniñ teşkilâtçıları bildirgenine köre, filmni baqmaq içün 70-ten ziyade iştirakçi qayd etildi, olarnıñ arasında jurnalistler, belli cemaat erbapları, milliy cemiyetlerniñ vekilleri ve studentler bar edi.
Filmge içtimaiy ağlarda tiklengen Litvaniya Cumhuriyetiniñ ilk tasil ve medeniyet naziri Darius Kuolis seslendi.
"Ve men tüşündim: bu müimniñ premyerası LRT studiyasında (Litvaniya milliy televideniyesi) ne içün keçirilmesin? Vilnüs ve Klaypeda belediyeleri bu küçlü ikâyeni rus ve diger şeer mekteplerine ne içün teklif etmey?'', - dep yazdı o Facebook saifesinde.
Qırım.Aqiqatnıñ "Sessiz sürgünlik" vesiqalı filmi qırımtatarlar Qırımdan nasıl sürgün etilgenini, Rusiye qırımtatarlarnı kene nasıl evsiz qaldırğanını köstere. Qırımtatarlar vatanlarını ne içün kütleviy sürette terk etmege mecbur olğanları aqqında. 1944 senesi sovet akimiyeti qırımtatarlarnı zorbalıqnen yük vagonlarında çıqardı, şimdi ise Rusiye Qırımnıñ tamır halqını evini terk etmege mecbur ete.
Çekimler Poloniya, Almaniya, Belçika, Türkiye, Ukrayina ve işğal etilgen Qırımda keçti. Filmde film qaramanlarınıñ şahsiy arhivlerinden unikal kadrlar qullanıldı, olarnıñ bazıları ilk sefer derc etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
