Qırımlınıñ qız qardaşı Svetlana Ablâmitova haber etkenine köre, Gaziyev «Zonatelekom» apishane bağı vastasınen qorantasınen bağlandı. Onı 2024 senesi dekabrniñ 28-nde Vladimirdeki №2 apishanesinden çıqarğanlar. Etap eki aydan ziyade devam etti. Şimdi qırımtatarı Aqmescitten 12,7 biñ kilometr uzaqlıqta (avtobus, tren ve uçaqlarnen beraber üç künlik yol) buluna.
Bu vaqıt devamında Gaziyevler onıñnen bağlanıp olamay edi. Tek fevral ayında qırımtatarı tuvğanlarına telefon etip, Habarovskta tranzitte olğanını ve Kamçatqağa bilet sımarış etkenlerini bildirdi. Onıñ aytqanına köre, etap vaqtında pek boldurdı ve suvuqlandı.
Etap vaqtında ekinci kere Servet Gaziyev ailesine mart başında telefon etti. İK-5-ke ketirilgenini haber etti.
«Bu yıl 65 yaşını toldura. Esli-başlı, hasta adamnı uzaqqa yollaylar, koloniyağa barıp olamaycam artıq!.. Biraz merametli olsa ediler. Evine yaqın yollamağa mümkün degil edimi?..», – dep izaatladı Svetlana Ablâmitova.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2023 senesi yanvarniñ 11-nde Servet Gaziyevni 13 yıl apis cezasına mahküm etti ve 1 yıl 6 ay müddetine areket azatlığınıñ sıñırlanması tayin etildi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
