13 yılğa üküm etilgen qırımlı Server Zekiryayev üç yıldan berli Rusiyeniñ Tula vilâyetindeki Donskoy şeerinde İK-1 rejim odalarında tutula. Bu aqta apayı Zarema Zekiryayeva «Qırım birdemligine» bildirdi.
«Server bu insaniyetsiz şaraitlerde üç yıldan berli qala. Kamera çeşitli yekâne oda yerine ceza izolâtorı kele ve böyle devam ete. Çalışmağa, evge telefon etmege bermeyler, körüştirmeyler», – dedi o.
Bütün yaz Zekiryayev kamera çeşitli odada qaldı, soñra onı 12 künge ceza izolâtorına yollağanlar, dep qayd etile.
Qırımlı ve ailesi koloniya memuriyeti, regional cemaat nezaret komissiyası, prokuratura, Tula vilâyetindeki Tahqiqat komitetiniñ idaresi, mahkemege çoq muracaat etip, aqlarınıñ bozulmasına diqqat celp etmege talap ettiler. Amma İK-1 memuriyeti basqı yapmağa devam ete.
Bu yıl aprel ayında Qırımnıñ Bağçasaray rayon mahkemesiniñ qadısı Zekiryayevniñ kamera çeşitli odada dayanılmaz şaraitlernen bağlı memuriy davasını red etti.
«[Kanalizatsion] qapaqlar odamnıñ penceresinden eki-üç metrde buluna ve ep tolu. Qusqanımdan uyana edim», – dep aytqan edi qırımtatarı.
Bıltır mart ve avgust aylarında Server Zekiryayev bu koloniyada işkence aqqında bildirgen edi. Lâkin prokuratura ömür arqadaşına şaraitler «tutmaq içün uyğun», dep cevap berdi.
Berilgen malümatqa köre, kamerasında «Köpekler valsını» açıp tintüvler keçireler, tuvğanlarına advokatnı yollasınlar dep yazğan mektüplerini ise iç yollamaylar.
2017 senesi oktâbr ayında Rusiye uquq qoruyıcıları altı Bağçasaray sakinini tututı. Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametov. Rusiye FSBsi olarnı Rusiyede ve işğali altındaki Qırımda yasaqlanğan «Hizb ut-Tahrir» teşkilâtında iştirak etkenlerinde qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahmekesi 2020 senesi sentâbr ayında Bağçasaraydaki ekinci «Hizb ut-Tahrir davası» boyunca üküm çıqardı.