Rusiye mahkemesi 13 yılğa üküm etilgen Server Zekiryayevniñ Rusiyeniñ Tula vilâyetindeki Cezalarnı yerine ketirüv federal hızmetiniñ İK-1 koloniyasına qarşı davasını red etti, anda kamera çeşitli yerde «dayanılmaz tutuv şaraitleri» aqqında aytılğan edi. Bu aqta «Qırım birdemligine» uquqçı Rustem Kâmilev haber etti.
Zekiryayevniñ imayecisi onıñ mabüsi «işkence olaraq aytıla bilgen» şaraitlerni şikâyet ete, dep qayd etti.
«Kanalizatsiya quyusı yaqın olğanı içün bir sasıq qoqu bar. Kamera çeşitli yerde tutuv sebepleri formal – rejimni bozğan, kepka taqmağan ve selâmlaşmağan», – dep qayd etti Kâmilev.
Server Zekiryayev bir yıldan berli tutulğan kamera çeşitli yerde kanalizatsiya problemlerini tafsilâtlıca tarif etti.
«Kameramnıñ penceresinden eki-üç metr mesafede quyular bar ve er vaqıt tıqala. Qusqanımdan uyanğan edim», – dedi qırımlı.
Qadı memuriy davanı red etti, amma imaye Rusiye kontrolindeki Qırım Yuqarı mahkemesine istinaf şikâyetini bermege planlaştıra.
Bıltır mart ve avgust aylarında Server Zekiryayev bu koloniyada işkence aqqında bildirgen edi. Lâkin prokuratura ömür arqadaşına şaraitler «tutmaq içün uyğun», dep cevap berdi.
Berilgen malümatqa köre, kamerasında «Köpekler valsını» açıp tintüvler keçireler, tuvğanlarına advokatnı yollasınlar dep yazğan mektüplerini ise iç yollamaylar.
2017 senesi oktâbr ayında Rusiye uquq qoruyıcıları altı Bağçasaray sakinini tututı. Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametov. Rusiye FSBsi olarnı Rusiyede ve işğali altındaki Qırımda yasaqlanğan «Hizb ut-Tahrir» teşkilâtında iştirak etkenlerinde qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahmekesi 2020 senesi sentâbr ayında Bağçasaraydaki ekinci «Hizb ut-Tahrir davası» boyunca üküm çıqardı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
