Rusiye Federatsiyasında «qırımlı musulmanlar davası» boyunca mahküm etilgen Server Zekiryayev Rusiyeniñ Tula vilâyetindeki №1 tüzetüv koloniyasında işkencege oğramağa devam ete. Bu aqta ömür arqadaşı Zarema Facebookta bildirdi.
Onıñ aytqanına köre, bu seneniñ avgust ayından başlap qırımlını tutuv şaraitinde işkenceler aqqında defalarca haber etildi. Qadınnıñ aytqanına köre, aşağan soñ ve meşğuliyetler yapqan soñ o, köpük qusa, boğazında daima accı bir dad bar, başı aylana. Zekirâyevniñ sağlığı zayıflaşa, zeerlenüvler onıñ alını daa beterleştirmege devam ete. Bundan ğayrı, qırımtatarı kanalizatsiya borularından çıqqan dumanlarnı nefes almağa mecbur.
Zarema Zekiryayeva koloniya idaresi ve Rusiye prokuraturasına muracaat etti, amma kameralardaki şaraitler, iddia etilgenine köre, «uyğundır» dep cevap aldı.
«Men Rusiye Federatsiyasınıñ Tula vilâyeti teşkerüv komitetiniñ Teşkerüv bölügine aqayımnıñ tutuluv şaraitleri boyunca teftiş keçirilmesi talabınen mektüp yolladım. Cevap olaraq Tula vilâyetiniñ Donsköy şeeri teşkerüv bölüginiñ müdir vazifelerini eda etken kişini Rusiyeniñ Tula vilâyetindeki federal ceza hızmetiniñ Zekirâyev Serverge qarşı «PKU İK-1 mesulleri tarafından ola bilecek qanunsız areketler adisesi» muracaatınıñ baqıluvını teşkil etmege çağırğan vesiqa aldım», – dep yazılğan haberde.
Zekiryayev Rusiye apishanesiniñ işkence şaraitleri aqqında daa evel de aytqan edi. Qayd etilgenine köre, onıñ kamerasında «Köpek valsi» avasını çaldırıp, tintüvler keçireler, qorantasından advokat yollamağa rica etken mektüplerini ise teslim etmeyler.
2017 senesi oktâbr ayında Rusiye uquq qoruyıcıları altı Bağçasaray sakinini tututı. Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametov. Rusiye FSBsi olarnı Rusiyede ve işğali altındaki Qırımda yasaqlanğan «Hizb ut-Tahrir» teşkilâtında iştirak etkenlerinde qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahmekesi 2020 senesi sentâbr ayında Bağçasaraydaki ekinci «Hizb ut-Tahrir davası» boyunca üküm çıqardı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
