«Qırımlı musulmanlar davasınıñ» mabüsi, aq qorçalayıcı ve «Qırım birdemliginiñ» sabıq koordinatorı Server Mustafayev bel ağrılarından, em de Tambov şeerindeki Rusiyeniñ №1 ceza koloniyasında tutulğanda başlanğan psoriazdan şikâyet ete.
Bu aqta ömür arqadaşınen devamlı körüşüv vaqıtında subetleşken soñ ömür arqadaşı Mayye Mustafayeva «Qırım birdemligine» bildirdi.
Mustafayevniñ aytqanına köre, o, sert tutuv şaraitlerinde olğanda bel ağrısını is etip başlağan. Nevropatologqa barğan soñ oña ine ve rentgen yazdılar. Apishane ekimi bildirgenine köre, rentgenden soñ kene kelmek kerek, lâkin Mustafayev eki aydan berli bu teşkerüvge alınmay. O, rentgen yapılğan soñ bir-eki aydan soñ ekimge körünecegini tahmin etti.
Onıñ ömür arqadaşına tarif etkenine köre, Tambovnıñ İK-1-nde mütehassıslar yetmey. Müessiseniñ öz ekimleri bar, insanlarnı kelgen ekimlerge yazdıralar, büyük nevbet peyda oldı – mahkümler yazılğan soñ tek beş-sekiz aydan soñ ekimge körüne.
Bundan ğayrı, Mustafayevniñ beti ve tirseklerinde tökülüv oldı. O, psoriaz başlana ve şimdilik hastalıqnı öz ilâclarnen tedaviylemege imkânı bar, dep qayd etti. Aq qorçalayıcı apayına «siñir ve stressten» başlanması mümkün edi, dep paylaştı.
O, terror teşkilâtında iştirak etüv maddesiniñ ağırlığı sebebinden psihologik basqı aqqında tarif etti.
«Bulunğan idarede telükesizlik manaçığınen oña qaba davranalar. Yani insan bir şey yapmasa da, oña fikirleri içün böyle yapalar», – dep bildirdi Mayye Mustafayeva.
Server Mustafayev – «Qırım birdemligi» cemaat birleşmesiniñ koordinatorı. 2018 senesi tintüvlerden soñ uquq qoruyıcılar Server Mustafayev ve Edem Smailovnı apiske aldı.
2020 senesi sentâbrniñ 16-nda Rostov-na-Donudaki Cenübiy okrugınıñ arbiy mahkemesinde qırımlı aq qorçalayıcı 14 yılğa azatlıqtan marum etildi. Qabaatlar Bağçasaraydaki «Hizb ut-Tahrir davasına» ilâve etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
