Rusiye Federatsiyası tarafından 14 yılğa üküm etilgen qırımlı Server Mustafayevniñ Rusiyeniñ Tambov vilâyetindeki İK-1 sert tutuv şaraitleri barakında közleri yaramay körmege devam ete. Bu aqta «Qırım birdemligi» Kreml reinesiniñ ömür arqadaşı Mayye Mustafayevanıñ haberine esaslanıp bildire.
Onıñ aytqanına köre, aqayınıñ köz problemleri daa Novoçerkassk SİZOsında başladı. «Kiçik ariflerni başta körgen olsa, şimdi er şey bulançıq. Serverniñ közleri tez boldura», – dep ayttı qadın.
Sert tutuv şaraitlerinde olğanı içün qırımlı keçken seneniñ başında kirgen uquq fakültetinde oquşına devam etip olamay. Ğıyabiy bölükte oqumağa öyle de başlap olamadı. Qırımlınıñ ömür arqadaşı Rusiyeniñ Cezalarnı yerine ketirüv federal hızmetine şikâyet yolladı. Anda «meseleni çezmege» vade etkenler, amma bir deñişme yoq, dep bildire «Qırım birdemligi».
Mustafayev yarım yıldan berli sert tutuv şaraitlerinde buluna – «madde ağırlığı sebebinden» anda alındı. Qırımlı ekstremizmge meyilli olaraq cedvelde olsa da, tekrar cedvelge alındı.
Server Mustafayev – «Qırım birdemligi» cemaat birleşmesiniñ koordinatorı. 2018 senesi tintüvlerden soñ uquq qoruyıcılar Server Mustafayev ve Edem Smailovnı apiske aldı.
2020 senesi sentâbrniñ 16-nda Rostov-na-Donudaki Cenübiy okrugınıñ arbiy mahkemesinde qırımlı aq qorçalayıcı 14 yılğa azatlıqtan marum etildi. Qabaatlar Bağçasaraydaki «Hizb ut-Tahrir davasına» ilâve etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
