Rusiye mahkemesi Rusiye mahküm etken qırımlı Server Mustafayevniñ istinaf şikâyetini red etti. Mustafayev Rusiyeniñ Tambov şeerindeki koloniyasına tranzit etilgende tutulğan Râzandaki SİZO-1-ne qarşı memuriy dava boyunca Rusiye mahkemesiniñ qararına itiraz bildirmege tırıştı.
Uquqçı Lilâ Gemeci «Qırım birdemligi» teşkilâtına bildirgenine köre, Mustafayev SİZO-1-de bulunğanda aqlarınıñ bozuluvı çoq qayd etildi.
«Saç qırqma maşinası alındı, diniy edebiyat, ilâcları alındı, qanunğa köre aş berilmedi... Qorantasınen laf etkende qırımtatarca subetleşmege izin berilmedi. Bular №1 tahqiqat izolâtorına qarşı dava açtırmaq içün sebep oldı», – dep ayttı uquqçı Lilâ Gemeci.
Mustafayevniñ imayesi bu qararnı temyiz qurulışında şikâyet etmege niyetlene. Râzan mahkemesi Mustafayevge qarşı davanı red etip, yazma delillerni ve şaatlarnıñ aytqanlarını davağa qoşmağa razı olmadı.
Server Mustafayev – «Qırım birdemligi» cemaat birleşmesiniñ koordinatorı. 2018 senesi tintüvlerden soñ uquq qoruyıcılar Server Mustafayev ve Edem Smailovnı apiske aldı.
2020 senesi sentâbrniñ 16-nda Rostov-na-Donudaki Cenübiy okrugınıñ arbiy mahkemesinde qırımlı aq qorçalayıcı 14 yılğa azatlıqtan marum etildi. Qabaatlar Bağçasaraydaki «Hizb ut-Tahrir davasına» ilâve etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
