Rusiyeniñ Rostov-na-Donudaki Cenübiy okrugınıñ arbiy mahkemesi oturışuvında Bağçasaraydaki ekinci «Hizb ut-Tahrir davası» boyunca taraflarnıñ munaqaşaları devam ete. Sentâbrniñ 8-nde dava mabüsi, «Qırım birdemligi» cemaat birleşmesiniñ koordinatorı, cemaat jurnalisti Server Mustafayev soñki sözüni ayttı.
Onıñ aytqanına köre, Rusiye küç qurulışları onıñ cemaat ayatında iştirakini «bastırmağa» tırışqan edi, dep bildire «Qırım birdemligi».
«Meni «Qırım birdemliginiñ» koordinatorı olaraq qorquzmağa, Qırımnı terk etmeme zorlamağa, 2014 senesi barışıq ve qanun çerçivesinde başlağan tirenüv ruhını yoq etmege tırıştılar. Meni Qırımnıñ memuriy sıñırında çoq sorğuğa çekip tutqan ediler, sorğu ve profilaktik subetlerge çağırğan ediler. Apiske aluv arfesinde ve ondan evelsi meni taqip ettiler. Apiske alınğanımdan eki kün evelsi meni beyaz «Şkoda» taqip etti. Qanunsız bir şey yapmadım, aq qorçalayıcı ve jurnalist faaliyetinen oğraştım. Qaçacaq yerim yoq, Qırım – menim evim», – dedi Mustafayev.
FSB, cemaat jurnalistiniñ sözlerini izaatlamadı.
Rusiye prokuraturası bu davanıñ bütün mabüsleri içün apis cezası istedi: Marlen Asanovğa – 20 yıl ve 800 biñ ruble para cezası, Memet Belâlovğa – 21 yıl, Timur İbragimovğa – 20 yıl. Olarnı «Hizb ut-Tahrir» bölüginiñ qurucıları dep qabaatlaylar.
Qalğan dava mabüsleri içün böyle cezalar istediler: Server Zekiryayevge – 15 yıl, Server Mustafayevge – 17 yıl, Seyran Saliyevge – 19 yıl, Ernes Ametoğa – 17 yıl ve 6 ay, Edem Smailovğa – 17 yıl ve 6 ay.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
