Qırımda Razdolnoye qasabasında Rusiye uquq qoruyıcıları qırımtatar faali Server Bariyevniñ evini tinte. Bu aqta aprelniñ 6-nda saba «Qırım birdemligi» cemaat birleşmesi haber etti.
Yerli sakinlerniñ aytqanına köre, evi ögünde eki beyaz mikroavtobus tura.
«Server Bariyev tiş tehniki olıp çalışa ve vatandaş faaliyetinen oğraşa. 2019 senesi yanvar ayında onıñ evinde ve daa eki qırımtatar faali Osman Osmanov ve Ernest Emirasanovnıñ evinde Ekstremizm ile küreş merkeziniñ hadimleri endi tintüv keçirgen edi. Faal, ara-sıra taqip etilgenini körgen edi, dep qayd ete edi. Bariyevni, onıñ aytqanına köre, alâ daa baqalar: «Tek maşinalar deñişe. Başta markalarını, nomeralarını qayd etken edim, soñra o qadar çoq oldı ve pek tez deñişe edi, bunı yapmayım endi», – dep aytıla haberde.
Bariyevniñ evinde keçirilgen tintüv aqqında Qırımtatar Milliy Meclisiniñ reisi Refat Çubarov da bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net/. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
