Link açıqlığı

Saatnıñ esas haberi

Kremlniñ siyasiy mabüslerine qoltutuv #SerbestMektübi fleşmobı başladı


Aqmescitte apiske alınğan Qırım.Aqiqat frilanseri Vladislav Yesipenko (soldan) ve qırımtatar faali Nariman Celâl (sağdan)
Aqmescitte apiske alınğan Qırım.Aqiqat frilanseri Vladislav Yesipenko (soldan) ve qırımtatar faali Nariman Celâl (sağdan)

Ukrainalı siyasiy mabüsler, şu cümleden qırımtatarlarğa qoltutuv #SerbestMektübi aktsiyası başladı. Faaller al-azırda Rusiyede apiste tutulğanlarğa mektüp yazmağa çağıra.

«Maqsadımız – siyasiy mabüslerge qoltutmaq, olarnı sistema ile bir özlerini qaldırmamaq, olarnı tış dünyadan çetleştirmege imkân bermemek ve lâqayt olmağanımıznı köstermektir! Mektüp yazıp yollamaq – qıyın degildir ve çoq vaqıt almaz. Şimdi bu tek mektüp, tek sözler degil, bu lâqaytsız degilmiz ve apiste tutulğan qabaatsız insanlarğa küç ve işanç beremiz», – dep qayd ete fleşmob teşkilâtçıları.

Bu fleşmobda iştirak etmek içün elnen mektüp yazmaq ya da bastırmaq kerek. Mektüp rusça yazılmalı, qırımtatarca selâmlaşmaq mümkün. Teşkilâtçılarnıñ qayd etkenine köre, mektüpler tsenzuradan keçe, şunıñ içün birine zarar ketire bilecek bir şey yazmamaq kerek. İstegenler zarfqa fotoresim, varaqa qoya bile.

Fleşmob iştirakçileri yazılğan mektüp, imzalanğan zarf, varaqa ve ilâhre ile foto yapıp, Facebooktaki saifesine #SerbestMektübi heşteginen qoymalı. Paylaşuvda diger insanlar da qayd etilmeli. Aktsiya aqqında tafsilâtlıca mında tarif etile.

Noyabrniñ 15-nde Kyivdeki Sofiya meydanında «Boş kürsüler» er yıllıq aq qorçalayıcı aktsiyası olıp keçti. Onıñ maqsadı Rusiyede ve Qırımda tutulğan ukrainalı siyasiy mabüsler, Donetsk ve Lugansk vilâyetleriniñ işğal etilgen topraqlarında esir alınğanlarğa qoltutmaqtır. Bu yıl #PrisonersVoice büyük kampaniyası çerçivesinde meşur yazıcı, jurnalist, oyuncı ve çalğıcılar Kreml reinelerine mektüp yazıp, olarnı aktsiyada oqudı.

Ukraina prezidenti Volodımır Zelenskıynıñ noyabrniñ 26-nda olıp keçken matbuat konferentsiyasında bildirgenine köre, Kyiv Türkiye prezidenti Recep Tayyip Erdoğan vastasınen Vladimir Putinge Ukraina azat etilüvini beklegen ukrainalı siyasiy mabüslerniñ cedvelini berdi.

«(Siyasiy mabüsler – QA) Cedvel Türkiyege berildi. Yaqında prezident Erdoğannen laf ettim. Rusiye prezidentinen körüşti ve alâqa gruppaları seviyesinde cedveller Rusiye tarafına berildi. Oña (Erdoğanğa – QA) teşekkürler bildirmege isteyim, çünki o, bunı rica etti, umumen ayttı, amma qırımtatarlarğa diqqat ayırdı, çünki bu onıñ şahsiy meselesidir. (Rusiyeden – QA) cevap bekleymiz, amma şimdilik yoq», – dedi Zelenskıy.

Rusiye prezidentiniñ matbuat kâtibi Dmitriy Peskov Zelenskıynıñ malümatını tefsir etmedi.

Zelenskıynıñ Qırım kütleviy haber vastalarına bildirgenine köre, Kreml ukrainalı siyasiy mabüslerni, hususan qırımlılarnıñ Rusiye apsinden azat etüv esnasını «aqsata», dep aytqan edi.

Ukraina Yuqarı Radasınıñ insan aqları vekâletlisi Lüdmila Denisova Ukraina ve Rusiye arasında tutulğan şahıslarnı deñişüv muzakereleri Rusiye akimiyeti sebebinden aman-aman toqtatıldı, dep qayd etken edi.

Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep bildirgen edi. Qırımnıñ Rusiye yolbaşçısı Sergey Aksenov Qırımda siyasiy mabüsler «kesen-kes yoq», dep israr ete.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG