«Serbest Qırımğa mektüpler» aktsiyası yılnıñ soñuna qadar uzatıldı, dep haber ete Ukrayına prezidentiniñ Qırım Muhtar Cumhuriyetindeki temsilciligi.
Müessise Ukrayına prezidentiniñ Qırım Muhtar Cumhuriyetindeki temsilciliginiñ saytında siyasiy mabüslerniñ cedvelini ve tutulğan yerlerniñ haritasını baqıp, aktsiyağa qoşulmağa teklif ete.
«Mektüp yazıñız: özüni tanıtıp, ne içün yazmağa istegeniñizni aydınlatıñız. Etrafıñızda ve dünyada olıp keçkenlerni yazıñız, film, kitap, seyaat, tabiat, iş aqqında. Duyğulı ya da külünçli ikâyeler yazıñız, teessuratlarıñıznı paylaşıñız», – dep yaza Ukrayına prezidentiniñ Qırım Muhtar Cumhuriyetindeki temsilciligi.
Müessise şunı qayd etti: «Apishane tsenzurası mektüpni keçirsin dep, onı rusça yazmaq kerek. Yollağan ve alacaqnıñ adını da rusça yazmaq kerek, amma yollağan memleketiñizniñ tilinde de yazmaq mümkün».
Mektüp yazma qaidelerini ZMINA aq qorçalayıcı teşkilâtınıñ saytında körmek mümkün.
Fevralniñ 19-nda Ukrayınada «Serbest Qırımğa mektüpler» aktsiyası başladı. Teşebbüs ukrayınalılar ve diger memleketlerniñ sakinlerini Rusiye qanunsız tutqan qırımlı siyasiy mabüslerge mektüp yazmasına çağıra. Maqsadı – Kremlniñ ukrayınalı reineleri aqqında hatırlatıp, olarğa qoltutqanını köstermek. Aktsiya mayısnıñ 19-na qadar devam etecek, dep planlaştırılğan edi.
2024 senesi mart ayında Ukrayına Yuqarı Radasınıñ insan aqları vekâletlisi Dmıtro Lubinets Türkiye ombudsmeni Şeref Malkoç ile körüşip, oña 2014 senesinden berli Rusiye akimiyeti tarafından Qırımda tutulğan 216 Ukrayına vatandaşınıñ cedvelini berdi.
Ukrayına Prezidentiniñ Qırım Muhtar Cumhuriyetindeki Temsilciliginiñ malümatına köre, 2024 senesi fevralniñ 19-nde Rusiyede 208 qırımlı siyasiy mabüs tutula, 125-i - qırımtatarıdır.
«Qırım aq qorçalayıcı gruppasınıñ» idare reisi Olga Skripnik haber etkenine köre, eñ azından 200 Ukrayına vatandaşı Qırımda uydurılğan siyasiy davalar boyunca apiste tutula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
