Edem Bekirov SİZOda azap şaraitlerinde buluna – advokat (video)

Cumaaqşamı künü, yanvarniñ 10-nda, Rusiye kontrolindeki Qırım Yuqarı mahkemesinde patlayıcı madde ve silânı qanunsız tutqanında qabaatlanğan qırımtatar faali Edem Bekirovnıñ apiske alınmasına qarşı itiraz arizası baqıldı. Dava baqılğanda imaye tarafı Edem Bekirov sağlıq vaziyetinden sebep nezaret altında qalamaz, dep bildirdi. Yuqarı mahkeme buña qulaq asmayıp, Aqmescitniñ Kiyev rayon mahkemesi çıqarğan qararnı deñiştirmedi. Böylece, Edem Bekirov 2019 senesi fevralniñ 11-ne qadar SİZOda qalacaq. Bekirovnıñ advokatları qayd ete ki, mabüske kerekli tibbiy yardım kösterilmey. Advokat İslâm Velilâyevniñ aytqanına köre, cumaertesi künü, yanvarniñ 14-nde, Edem Bekirovnı bir aftağa Semaşko Cumhuriyet hastahanesine alıp ketecekler. Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi. («Qırım birdemligi» cemaat teşebbüsiniñ video parçaları da qullanıldı)