Link açıqlığı

Saatnıñ esas haberi

Sentsovnıñ qız qardaşı Ukraina vatandaşı olğanını bildirdi


Natalya Kaplan
Natalya Kaplan

Rusiyede apiske alınğan ukrainalı rejissör Oleg Sentsovnıñ eki doğmuş qız qardaşı Natalya Kaplan Ukraina vatandaşlığını aldı, dep bildirdi. Bu aqta o, Facebook saifesinde yazdı.

«Niayet! Ukraina vatandaşım!», – dep qısqadan yazdı Kaplan.

Ukraina vatandaşlığını alğanınen bağlı tafsilâtlar bermedi. Qırım.Aqiqat Kaplandan izaat bermesini rica etti.

Sentsovnıñ qız qardaşınıñ malümatını isbatlaycaq diger menbalar yoq.

Keçken sene Rusiye vatandaşlığı olğan Kaplannıñ Ukrainada vaqtınca yaşav aqqını alğanda qıyınlıqları peyda oldı.

Qırımlı rejissör Oleg Sentsov ve anarhist Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.

Oleg Sentsov Rusiye şimalindeki Labıtnangi şeerinde apiste yata. Aleksandar Kolçenko ise Uraldaki Kopeysk şeeriniñ koloniyasında buluna.

Keçken sene Rusiye apishanelerinde tutulğan bütün ukrainalı siyasiy mabüslerni azat etmek talabı ile tutqan 145 künlik açlıqtan soñ Oleg Sentsov «aşamağa yazma şekilde razı oldı». O, bunı «zornen aşatuv telükesi bar olğanından mecburiy adım» dep adlandırdı. Amnesty International zornen aşatuv işkence ola, dep bildirdi. 2018 senesi oktâbrniñ 25-nde Sentsovğa Avropa parlamentiniñ «İfade serbestligi» içün Saharov mukâfatı berildi.

«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.

XS
SM
MD
LG