Ukraina ve Rusiye arasında ukrainalı siyasiy mabüslerni almaşuv çerçivesinde azat etilgen Oleg Sentsov ve Oleksandr Kolçenko Rusiye koloniyalarından Ukrainağa qaytqan soñ berecek ilk matbuat konferentsiyalarını ilân etti. Sentsovnıñ Facebook saifesinde haber etkenine köre, tedbir sentâbrniñ 10-nda saat 12-nde başlanacaq.
Teşkilâtçılarnıñ bildirgenine köre, matbuat konferentsiyasınıñ yeri «jurnalistlerge qayd şeklinde yazğan elektron poçtalarına haber etilecek».
Daa evel haber etilgeni kibi, Qırım Muhtar Cumhuriyetiniñ prokuraturası Rusiye apishanelerinden azat etilgen qırımlılar Oleg Sentsov ve Oleksandr Kolçenkonı şaatlıq etmeleri içün davet etmege planlaştıra.
Kyivge qaytqan Oleg Sentsov çoq laf etmeyip, «ukrainalılarnıñ küreşi bitmedi», dep qayd etti. Şimdilik o, jurnalistlernen subetleşmege istemey, amma Facebookta yazmağa vade etti.
Oleksandr Kolçenko Ukrainağa qaytıp, aliy oquv yurtunda oquşını devam etmege ve iş tapmağa planlaştıra, dep ayttı.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı.
Deñişim çerçivesinde Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sızonovıç ve 2018 senesi noyabr ayında zapt etilgen ukrainalı deñizciler azat etildi.
Ukraina prezidenti Volodımır Zelenskıy ukrainalılarnı ava limanında qarşıladı. O, Qırım.Aqiqatqa izaat berip, Rusiyede apiste tutulğan qırımtatar faalleriniñ azat etilüvi Ukraina-Rusiye almaşuvınıñ ekinci basamağı olacaq.
