Rusiyede mahküm etilgen ukrainalı rejissör Oleg Sentsov açlıqnı toqtatqan soñ tüzelip başladı, amma Labıtnangi (Rusiye) koloniyasınıñ tibbiy bölüginde qalmağa devam ete.
Bu aqta rusiyeli rejissör Askold Kurov Qırım.Aqiqatqa tarif etti.
«Açlıq vaqtında olğanına baqılsa, daa yahşı körüne. Sentsov tüzele, kilo ala. Amma tibbiy bölükte ekimlerniñ nezareti altında qala, çünki o qadar uzun açlıqnıñ aqibetleri ne olacaq daa belli degil», – dedi Kurov.
Dekabrniñ 7-nde Kyivdeki Dovjenko-merkezinde Rusiyede mahküm etilgen ukrainalı rejissör Oleg Sentsovnıñ pyesası esasında «Nomera» («Raqamlar» – QA) spektakliniñ premyerası olıp keçti. Tedbirni Sentsovnıñ mahküm etilmesi aqqında «Protsess» («Esnas» – QA) filmini çıqarğan rusiyeli rejissör Askold Kurov ziyaret etti.
Bundan evel Ukraina Yuqarı Radasınıñ insan aqları vekâletlisi Lüdmila Denisova Rusiye tarafına muracaatta bulunıp, Rusiyede apiste tutulğan ukrainalı rejissör Oleg Sentsovnıñ sağlıq vaziyeti aqqında malümat bermege talap etken edi.
Sentsovnıñ advokatı Dmitriy Dinze onı Rusiye koloniyasında ziyaret etken edi. Advokatnıñ aytqanına köre, Sentsov özüne kele, amma «açlıq izsiz olmadı».
Sentsov Rusiye apishanelerinde tutulğan ukrainalı siyasiy mabüslerni azat etmek talabı ile 145 künden berli tutqan açlıq narazılığından soñ «aşamağa razı olğanını yazma şekilde bildirdi».
Oktâbrniñ 25-nde Sentsov Avropa parlamentiniñ Saharov «Fikir serbestligi» mukâfatına nail oldı. Taqdirlev merasimi dekabrniñ 12-nde Strasburgda ötkerilmeli.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
