Rusiye apishanesinden azat etilgen ukrainalı rejissör, qırımlı Oleg Sentsov Amnesty International halqara aq qorçalayıcı teşkilâtınıñ Londra merkezinde çıqışta bulundı. Sentsov, destek içün teşekkür bildirerek, Rusiyeniñ qırımtatarlarnı, hususan «Hizb ut-Tahrir davası» çerçivesinde diniy sebeplerden taqip etkenini tarif etip, Rusiyeniñ siyasiy sebeplerden apiste tutqan bütün Ukraina vatandaşlarınıñ azatlığı içün küreşmege çağırdı, dep bildire «Amerikanıñ sesi».
Olar da, men de bir cinayet yapmadıqOleg Sentsov
Kremlniñ eski siyasiy mabüsi Oleg Sentsov Amnesty Internationalnıñ diqqatını Rusiye mahkemesiniñ Yaltadaki «Hizb ut-Tahrir davasınıñ» altı mabüsi olğan Ukraina vatandaşına çıqarğan ükmüne celp etti.
«Olarnı vatandaşlıqları ve dinleri içün 8 yıldan 18 yılğa qadar sert rejimde qalmalarına üküm ettiler. Olar da, men de bir cinayet yapmadıq», – dedi Sentsov.
Putin barışıq olmasını istemey, ve oña inanmağa mümkün degilOleg Sentsov
Onıñ qayd etkenine köre, onı ve diger ukrainalı siyasiy mabüslerni Rusiyeniñ Rostov-na-Donu mahkemesinde mahküm ettiler.
«Bu nümüneviy bir şey. Sistemada bir şey deñişmedi. Putin barışıq olmasını istemey, ve oña inanmağa mümkün degil», – dep qayd etti Oleg Sentsov. O, Rusiye reberliginiñ faaliyetini – em Rusiyege, em de Ukrainağa nisbeten – cinaiy dep adlandırdı.
Sentsov Putin aqqında ayta
Putinge inanmayım. Bu pek ayneci, utanmaz, pek sert, printsipsiz bir insan olğanını añlamaq kereksiñizOleg Sentsov
«Putinge inanmayım. Bu pek ayneci, utanmaz, pek sert, printsipsiz bir insan olğanını añlamaq kereksiñiz. Barıştırıcı maskası – tek maska. Altında – diktator ve qatilniñ beti… Bunı añlasañız, Rusiye atacaq adımlarını da bileceksiñiz», – dep Sentsov, Amnesty Internationalde keçirilgen körüşüv iştirakçileriniñ Moskva Donbastaki cenkni bitirmege azırmı sualine cevap berdi.
Oleg Sentsovnıñ qayd etkenine köre, bir çoq rusiyeli Putinge inana.
Sentsovnıñ qayd etkenine köre, Rusiye apishanelerinde keçirgen beş yılı devamında Rusiye ealisiniñ çeşit qatlam vekillerinen subetleşmege imkân oldı, ve emin oldı ki, bir çoq rusiyeli Putinniñ yapqanlarına qoltuta.
Apishanede sistemanıñ merametsizligine ve adaletsizligine oğrağan insanlar bile sistemadan nefret ete, amma temiz yürekli Putinge işanalarOleg Sentsov
«Apishanede sistemanıñ merametsizligine ve adaletsizligine oğrağan insanlar bile sistemadan nefret ete, amma temiz yürekli Putinge işanalar. Bu Putinniñ sımasını yekâne doğru memleket reberi olaraq köstergen 20 yıllıq propagandanıñ neticesidir», – dep tarif etti Sentsov.
Aynı vaqıtta, Rusiyede prezidentke inanmağan insanlar bar, dep ayta.
«Amma olar Ukraina, Avropadan nefret etip, onıñ siyasetine qoltuta. Çünki beş yıldan berli televizor olarğa Ukrainada faşistler akimiyetni zapt etti, Amerika ve Avropa Rusiyege ücüm etecek ya da pahıllap bir zarar ketirecek, dep aytalar», – dey Oleg Sentsov.
Oleg Sentsov 2014 senesi mayısında Rusiye işğal etken Qırımda apiske alındı. Onı Rusiyege çıqarıp, «terakt azırlağanında» qabaatladılar ve 20 yıl apis cezasına üküm ettiler.
2019 senesi sentâbr ayında Rusiye Oleg Sentsovnı diger 35 mabüsnen beraber Ukrainağa teslim etti, olar Ukrainağa qarşı yapqan cinayetleri içün mahküm etilgenlerge deñiştirildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
«Amerikanıñ sesinden» alındı
