Kremlniñ sabıq siyasiy mabüsi, qırımlı ukrain rejissöri Oleg Sentsov bugün Donbasta tutulğan şahıslarnı deñişim esnasını izaatlap, azat etilgenler arasında siyasiy mabüs qırımtatarlar yoq, dep tahmin etti, çünki Rusiye prezidenti Vladimir Putin «Ukrainadan uzlaşmasını istey».
«Rusiye onıñ apishanelerinde bir yıldan çoq tutulğan iç kimseni bermey, qırımtatarlar azat etilmey. Dudka, Kuku, Vıgovskiy, Mustafayev, Şçur, Gafarov ve yüzlernen diger mabüs apiste qala. Elbette, Putin olarnı bermege istemey, Ukrainadan uzlaşmasını istey, onı kene yavaş-yavaş keri, topraq qulluğına qaytarmağa istey. Bizimkilerni azat etmek kerek, amma memleketni satmağa kerekmey», – dep yazdı Sentsov.
Cumaaqşamı künü, aprelniñ 16-nda, Donbasta tutulğan şahıslar deñişimi ötkerildi. Berilgen malümatqa köre, deñişim Ğorlivka civarındaki «Mayorsk» keçiş noqtası rayonında keçirile, 19 Ukraina vatandaşı azat etildi. Prezident ofisi qayd etkenine köre, Qırımda ve Rusiyede tutulğan ukrainalı mabüslerniñ azat etilüvinen bağlı muzakereler devam ete.
Ukraina ve «LDNR» gruppirovkaları arasında tutulğanlarnı soñki deñişim 2019 senesi dekabrniñ 29-nda oldı. Donetsk ve Lugansk vilâyetleriniñ işğal altındaki rayonlarından 81 ukrainalı azat etildi: 76-sı Ukraina ükümetiniñ kontroli altındaki topraqqa qayttı, daa beşi Rusiye gibrid quvetleri kontrol etken yerlerde qalmağa istedi. 76-dan 12-si endi sabıq cenk esirleri ola, 64-ü – vatandaştır. Ekinci tarafqa 124 insan teslim etildi.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
