Kremlniñ eski siyasiy mabüsi, qırımlı ukrain rejissöri Oleg Sentsov dekabrniñ 9-nda Parijde olıp keçken «normand körüşüvine» müsbet qıymet kesti.
«Kimse memleketni satmadı. Esirlerni qaytarmağa tırışalar. Muzakereler yahşı. Amma ucuz gaz lafları meni qasevetlendire», – dep yazdı o, Facebookta.
«Normand formatında» muzakereler yekünlengen soñ keçirilgen matbuat konferentsiyasında Rusiye prezidenti Vladimir Putin «Ukraina, Rusiyenen temiz iş aqqında» añlaşsa, gaznı 25%-ğa ucuz ala bile», dep ayttı.
«Belli bala şiirçigini hatırlaysıñıh: «Bizde gaz bar. Ya sizde?». Sizde de bar. Ve olacaq. Amma beraber yapacaq temiz işimiz aqqında añlaşsaq, qat-qat ucuz olacaq. Bugün qullanıcı alğanından 25%-ğa ucuz ola bile. İlk evelâ, sanayı qullanıcısı», – dedi Rusiye prezidenti.
Ukraina prezidenti Volodımır Zelenskıynıñ bildirgenine köre, «Normandiya formatındaki» muzakerelerde Ukraina ve Rusiyede tutulğan şahıslarnı «er kesni er keske» şeklinde deñişim aqqında añlaştılar. Matbuat konferentsiyasında Zelenskıy, «Donbas ve Rusiye ilhaq etken Qırım – Ukrainadır», dep qayd etti.
Parijde dekabrniñ 9-nda aqşam Ukraina, Rusiye, Frenkistan ve Almaniya liderleriniñ körüşüvi olıp keçti. Ukraina prezidenti Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin ile eki taraflı körüşüvler keçirdi.
