Rusiye esirliginden azat etilgen qırımlı ukrain rejissör Oleğ Sentsovnıñ "avropalı körüşleri bar" ve o "Rusiyede kibi yaşamağa" istemey. Bunı o, sentâbr 18-inde "Ğromadske" ukrain haber resursına intervyü bergende ayttı.
"Şübesiz, menim avropalı körüşlerim bar. Ne içün Maydanğa barğanımnı çoq adamğa endi aytqan edim: men, adamlar Avropada yaşağanları kibi yaşamağa isteyim. Avropa memleketi olğanımıznı, olarnıñ printsipleri boyunca yaşağanımını, soñ ise olarnıñ yaşayış standartlarınen ve ilâhre. Rusiyede (o ise Sovet Birligine yol tuta) yaşağanları kibi ise - yaşamağa istemeyim. Men Sovet Biriginde doğdım, az buçuq onı kördim. Dağılması ve bütün bu vaziyet aqlımda yahşı qaldı. Daa tutulğanımdan evel Rusiyeni bayağı dolandım ve bugünki Rusiye ne olğanını yahşı añlayım. Ve men bunı begenmeyim", - dedi Sentsov.
Daa evel Oleğ Sentsov, Qırımnı Rusiye qısmı olaraq iç bir vaqıt tanımaycağını ve bu mesele "atta muzakere de etilmey", dedi.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi.
Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
