Rusiyede mahküm etilgen Ukraina rejissöri Oleg Sentsov Avropa parlamentiniñ «İfade serbestligi» içün Saharov mukâfatına lâyıq körüldi. Bu aqta Radio Svobodanıñ Brüssel mühbiri haber ete.
Bundan evel Sentsov bu mukâfatnı ala bilecek final iştirakçileri sırasına kirsetilgen edi.
Sentsovnıñ namzetini Avropa parlamentindeki Avropa halq firqası köstergen edi.
Mukâfat noyabrniñ 12-nde Strasburgda berilmeli.
1988 senesinden berli Avropa parlamenti Saharov mukâfatını insan aqları ve ifade serbestligini qorçalağan insan ve teşkilâtlarğa bere.
Keçken sene Saharov mukâfatınıñ laureatları Venesuelanıñ demokratik muhalifeti ve siyasiy mabüsleri olğan edi.
Oktâbrniñ 5-nde Rusiye apishanesiniñ nezaretçileri bildirdi ki, 145 künden berli açlıq tutqan Sentsov «aşamağa razı olğanını yazma şekilde» bildirdi. Sentsov, Rusiye apishanelerinde tutulğan ukrainalı siyasiy mabüslerniñ azat etilmesini talap etip, açlıqqa başlağan edi.
Daa soñra peyda olğan malümatqa köre, Sentsov oktâbrniñ 6-nda açlıqnı toqtatacaq. O, «zornen aşatacaqlar dep, bunı mecburiy adım» dep adlandırğan edi.
Amnesty International, zornen aşatma azap ola, dep qayd etti.
Advokat Dmitriy Dinze ve Sentsovnıñ qardaşı Natalya Kaplan mahküm etilgen rejissörniñ cigeri bozula ve büyrekleri işini toqtata bile, dep haber etkenler. Rusiye ekimleriniñ fikirince, Sentsov açlıqtan çıqma esnasına dayanamaması mümkün.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
