"Shahed-136/131" pilotsız uçaqlarınıñ ücümi neticesinde Mıkolayivde 20-den ziyade mesken ev zarar kördi. Bu aqta şeer yolbaşçısı Oleksandr Senkeviç haber etti.
''Etrafnı teşkeremiz. Malüm ki, 20-den ziyade mesken ev – şahsiy ve çoq qatlı, ofis, şahsiy müessise zarar kördi. Kommunal müessiseniñ territoriyasında da aqibetler bar", - dep yazdı o.
Onıñ aytqanına köre, yaralanğanlar yoq.
Mıkolayiv vilâyetiniñ arbiy memuriyetiniñ yolbaşçısı Vitaliy Kimniñ aytqanına köre, ücüm neticesinde sanayı müessisesi ve şahsiy evniñ territoriyasında yanğın çıqtı. Onıñ aytqanına köre, çoq qatlı evler ve sport infrastrukturası zarar kördi.
Fevralniñ 8-ne keçken gecesi Rusiye Ukrayinağa Çauda (Qırım) burnundan 17 Shahed-136/131 pilotsız uçaqnen ücüm etti . Ukrayina arbiy quvetleriniñ bildirgenine köre, Mıkolayiv, Odesa, Vinnıtsâ ve Dnipropetrovsk vilâyetlerinde ukrayin arbiyleri 11 "şahed"ni urıp tüşürdiler.
Tünevin Ukrayinağa endirilgen raketa ücümi vaqtında Mıkolayivde 30-dan ziyade mesken ev zarar kördi. Oleksandr Senkeviç, ağır yaralanğan yerli sakinlerden biri reanimatsiyada vefat etti, bir qaç insan yengil yara aldı, olarğa anda yardım kösterildi, dep bildirdi.
Ukrayina prezidenti Volodımır Zelenskıy yanvarniñ 30-nda bildirdi ki, yılnıñ başından berli Rusiye Ukrayinağa 330-dan ziyade çeşit raketa ve tahminen 600 arbiy uçucısız uçaqnı uçurdı.
Moskva, isbat ve şaatlıqlarğa baqmadan, tam cenk başlağanından berli Ukrayinada vatandaşlarğa ateş açılğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
