2024 senesiniñ birinci kvartalında Rusiye quvetçileri Qırımda 33 tintüv keçirdi, 28-i qırımtatarlarnıñ evlerinde oldı. Bundan da ğayrı, 41 yaqalanuv, ya da tutuluv, 46 sorğu, sorav ve "subet" qayd etildi, em de Rusiye quvetçileri tarafından 43 tevqif qayd etildi.
Böyle malümatnı Qırımtatar resurs merkezi Qırımda insan aqlarınıñ bozuluvı boyunca 2024 senesiniñ birinci kvartalında yapqan talilinde köstere.
QRM-niñ qayd etkenine köre, 41 tutulğan insandan 18-i qırımtatar edi.
"2024 senesiniñ I kvartalında 41 insan tutuldı, 18 qırımtatar. Qırım sakinleri Rusiyede yasaq etilgen "Hizb ut-Tahrir" teşkilâtına, Noman Çelebicihan adına batalyonğa alâqası bar olğanında şübeli sayılıp tutuldı, Rusiye Silâlı quvetleriniñ itibarını tüşürgeninde ve ilâhre qabaatlanıp tutuldı", – dep qayd etti QRM-niñ reisi Eskender Bariyev.
QRM-niñ malümatına köre, 43 apiske alınğan insandan 25-i Qırım yarımadasınıñ qırımtatar ealisinen bağlı.
43 adiseden 24-ü yañı tevqifler, 4-ü ükümler, 4-ü - memuriy cezalar, 12-si – apiste tutuv müddetiniñ uzatılması, dep añlattı QRM-niñ kommunikatsiyalar meneceri Tatyana Savçuk.
QMC-nde qayd etkenlerine köre, Qırımda tintüvlerniñ sayısı keçken senelerge köre arttı. Böyleliknen, 2024 senesiniñ birinci kvartalında 33 tintüv qayd etildi, 2023 senesiniñ aynı devirinde – 21, 2022 senesi – 10.
Qırımnıñ Rusiye akimiyeti Rusiye quvetçileriniñ qırımtatarlar ve diger siyasiy ya da diniy sebeplerden taqip etilgenlerge nisbeten areketlerini izaatlamay.
Qırımtatar resurs merkezi bildirgenine köre, bugünki künde azatlıqtan marum etilgen 194 qırımlı siyasiy mabüs qayd etildi, olardan 134 qırımtatardır.
Ukrayina Prezidentiniñ Qırım Muhtar Cumhuriyetindeki Temsilciliginiñ malümatına köre, 2024 senesi fevralniñ 19-na qadar Rusiyede 208 qırımlı siyasiy mabüs tutula, olardan 125 - qırımtatardır.
Daa evel Olğa Skrıpnık, eñ azından 200 Ukrayina vatandaşı Qırımda uydurılğan siyasiy davalar boyunca apiste yatqanını bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
