2024 senesiniñ birinci kvartalında uquq qoruyıcılar işğal etilgen Qırımda sekiz etap adisesini qayd etti, olardan 4-ü qırımtatarlarğa nisbeten. Bunı Qırımtatar resurs merkezi bildire.
Rusiye akimiyeti Bogdan Ziza, Arsen Abhairov, Yevgeniy Jukov, Vladimir Maladiko, Vladimir Sakat, Zaur Abdullayev, Eskender Abdülganiyev, Rustem Murasovnı etap etti.
Uquq qoruyıcılar qayd etkenine köre, keçken seneniñ aynı müddetinde 22 etap qayd etildi, 2022 senesi ise - 3.
"Siyasiy mabüslerniñ etap etilüvi insaniyetsiz şaraitlerde keçkenini qayd eteyik. Bundan ğayrı, işğalciler olarnı siyasiy sebeplerden Qırımdan alıp keteler, insanlar apishaneler yanında aktsiyalar keçirmesin dep, yaqınları ve tuvğanlarınen bağ qurmağa qıyınlaştırmaq içün", - dep aytıla haberde.
Daa evel QRM 2024 senesiniñ birinci kvartalında eñ azdan 13 fizikiy ve ruhiy sağlıqnıñ yüksek seviyesine aqqınıñ bozuluvı qayd etildi, dep bildirgen edi, 12-si qırımtatarlarğa nisbeten.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
