2022 ve 2023 seneleri Rusiye tarafından işğal etilgen Qırımda jurnalistlerge qarşı 162 basqı adisesi qayd etildi. Bu malümatnı ZMINA İnsan aqları Merkeziniñ leyha reberi Viktoriya Nesterenko bildire.
Nesterenko qayd etti ki, statistikada cinaiy taqipler, jurnalistlerniñ qaçırılması, memuriy protokollar, tintüvler ve İnternette qorquzuvlar bar. Onıñ fikrine köre, al-azırda Qırımda "erkin jurnalistika ve söz serbestligi içün yer qalmadı".
"Yarımadada Rusiye istilâsınıñ ilk eki aftasında işğalci akimiyet mustaqil jurnalistikanı yoq etti. "Yeşil adamçıqlar" matbuat vastalarınıñ ofislerine kelip, jurnalistlerni qıdırğanlar, olarnıñ Rusiyege çalışıp, işğalci akimiyetniñ Rusiye propagandasını çıqarması içün", — dep bildirdi Nesterenko.
Onıñ malümatına köre, Rusiye Federatsiyası Qırım ve Rusiye territoriyasında 16 jurnalistni qanunsız alda tuta.
"Rusiye devlet seviyesinde jurnalistlerniñ çalışmasını yasaq etip olamağanı içün, olar media hadimlerini apiske almağa tırışalar. Adetince olarnı terrorizm ve diversiya maddeleri boyunca mahkeme eteler", - dep bildirdi Nesterenko.
"İşğalciler olarnı deşetli şaraitlerde tuta, azatlıqtan marum etüv yerlerinde, hususan Rusiyede, olarğa yaman yanaşa ve ceza izolâtorlarına ya da bir kişilik kameralarğa avuştıralar", – dep qoştı o.
Ukrayina jurnalistleriniñ milliy birligi haber etkenine köre, eñ azından 28 ukrain media hadimi ve vatandaş jurnalisti, şu cümleden Qırımdan da, qanunsız tutuluv, esir alınuv, sahte qabaatlav ve sahte "mahkemeler" sebebinden esirlikte buluna.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
